Dutch midfielder hlui Wesley Sneijder chuan a vanglai khan inpumpek tak tak se chuan tunlaia footballer tha bera ngaih pahnih Lionel Messi leh Cristiano Ronaldo-te tluka tha a ni thei niin a sawi.

Kum 35 mi Sneijder hian kumin August thla khan inkhelh a chawlhsan a, a vanglai chuan ani aia midfielder tha hi an awm bik lo tih ngam a ni a, a sawi hi awihawm loh lutuk pawh a ni hran lo a tih theih awm e.

Sneijder hian kum 2002 khan Ajax-ah a football career a tana, Ajax bakah hian Real Madrid, Inter Milan, Galatasaray, Nice leh Al-Gharafa tan te khelin trophy eng emaw zah a chawia, kum 2010-a Inter Milan-in treble an lak tum khan an player pawimawh ber tia chhal ngam khawpin Inter tan khan a pawimawh.

Sneijder chuan, “Tlang taka sawi chuan inpumpek tak tak ila chuan Messi leh Ronaldo-te huanga awm thei tur kha ka ni a, keipawhin chu chu ka hria. Mahse khati anga tih kha ka duh lova, inchhirna pawh ka nei lo. Keimahah theihna a awm lo a ni lova, ka duh loh vang mai zawk a ni.

“Ka football career kha ka ‘enjoy’ em em a, khelmual pawn a ni emaw khelmual chhung emaw pawh nise nuam ka ti hle. Club level-a trophy ka chawi theih ang zawng zawng ka chawi veka, chuvang chuan inchhirna ka nei lo. Team player ka ni a, team anga hlawhtlinnaah khan ka lungawi a ni.

“Mi thenkhat chuan tun hnu thleng hian kum 2010 khan Ballon d’Or dawng tur ini min la ti thina, mahse Champions League chawi kha mimal chawimawina dawn aiin a nuam zawk tih ka lo hrilh thin. Ballon d’Or kha dawng ila chu duhthusam chu a ni ngei mai mahse miin dawng tur ka ni tia min hrilh ringawt pawh hi a lungawi thlak viau a ni,” a ti.