Messi hmachhawn a hautak ber: Van Dijk

01st April 2020, 11:04PM

Virgil van Dijk chuan professional football huanga a tel hnuah Lionel Messi chu hmachhawn hautak ber a nih thu a sawi.

Dutch defender Virgil van Dijk leh Lionel Messi te chu season liam taah khan an inhmachhawn a. UEFA Champions League semi final-ah Liverpool leh Barcelona te chu an inkhel a, second leg-ah ropui takin Reds chu an chak a ni.

Netherlands defender Van Dijk chuan Barcelona captain Lionel Messi chu a fak hle a, vawi ruk ngawt Ballon d’Or dawng thei Argentine star chu khawvela player ropui berte zinga mi a nih thu a sawi chhuak.

Van Dijk chuan, “Khelmuala forward hmachhawn harsa tak tak, thiam deuh deuh an tam a, heng zingah hian Lionel Messi aia hmachhawn hautak hi an awm lo ang,” a ti.

Messi chu hmachhawn hautak a tih ber laiin Sergio Aguero pawh a fak hle a, Manchester City striker chu ven harsa ber nia a hriat thu a sawi tel bawk a. Forward a hmachhawn hnem ve tawh thu sawiin Van Dijk chuan Argentine forward chu ven a buaithlak ber niin a sawi a ni.

Coronavirus vanga inkhelh theih a nih loh lai pawhin Van Dijk chuan a insawizawi reng thu sawiin, Premier League season chu chhunzawm leh dawn pawh ni se ngaihtuahawm a nih loh thu a sawi a, inkhel leh nghal thei turin a inpeih reng thu a sawi.

Liverpool chuan chawlh an puan lailawk hma khan point 25 zetin Premier League-ah hma an hruai hman a, tunah chuan engtikah nge an inkhelh leh theih dawn sawi theih a ni tawh rih lo a ni.

Copyright © inkhel.com 2024. All rights reserved.