Messi hian Serie A rawn luhchilh ve rawh se: Ronaldo

10th December 2018, 10:12PM

Cristiano Ronaldo chuan Lionel Messi chu Barcelona chhuahsan a Serie A lama zawm ve turin a sawm a, a cho pah bawk a ni.

Ronaldo chuan nipui lai khan a tual chaina hmun kalsanin Juventus chu a zawm thu sawiin, a tih ang bawka ti ve turin Messi chu a cho zui a. Messi hnenah Italy lama chona thar hmachhawn ve chhin turin a ti a ni.

“Messi hian min ngai viau maithei a. Kei chu England, Spain, Italy leh Portugal bakah ram tan pawh ka khel a, Messi ve chu Spain-ah ngar ngar a awm a. Ka khelhna ka sawn ta daih sia, tunah phei chuan min mamawh tawh viau maithei a. Ka tan chuan chona thar hmachhawn zel hi a nuam a, mi lawmna thlentu nih hi nuam ka ti a ni,” tiin Ronaldo chuan a sawi.

“Eng tikah emaw Messi hi Italy lamah rawn kal ve se ka ti khawp mai a. Keimah angin chona thar hmachhawn turin rawn che chhuak ve se. Spain-ah hian a hlim viau a nih chuan a lawmawm a ni mai a, a duhthlanna pawh a zahawm a. Footballer ropui tak a ni a, mihring tha tak a ni bawk a, mahse kei chuan engmah ngaih ka nei lem lo a. Hei hi ka nun thar a ni a, ka hlim ve tawk a ni,” a ti bawk.

A sawi zelnaah, “Kei leh Messi inkara inelna lampang ang zawnga sawi ka ni lo a, kei chuan ka tih tur hi ka ti mai a, ka khelhna club-ah chuan ka hlawhtling zel a, hei tluka pawimawh hi a awm lo a. Mi nena khaikhin nih hi ka duh lo a, a dik ka ti thei lo a. A tha tak tak chu thil tihah a lang mai a, sawi kual duah a ngai hran lo a. Ka khelhna reng rengah chuan hlawhtlin zel ka duh thin a, club leh ram tan pawh a danglam chuang lo a ni,” a ti.

Portuguese star Ronaldo hian January thlaah Juventus chuan player lak thar an mamawh lem lo tih sawiin, Marcelo tan erawh hmun a awm thu a sawi a. Serie A champion te chuan Gareth Bale chu an mamawh hran lo niin a sawi bawk a ni.

Copyright © inkhel.com 2024. All rights reserved.