Barcelona legend Carles Puyol chuan Lionel Messi chu kum 38 a tlin thleng pawhin a la inkhelh theih a rin thu a sawi.
Kumin June thlaah hian Argentina superstar Lionel Messi chu kum 33 a ni ve tawh dawn a, heti chung hian tun season chhungin La Liga-ah pawh a la che tha hle a. Tun thlengin vawi 19 inlanah goal 14 a thun tawh a, mi goal thun tur vawi 12 a siamsak tawh bawk a ni.
Hun rei tak chhunga a elpui ber Cristiano Ronaldo chu kum 35-a upa a ni tawh a, ani pawh Juventus tan a la langsar em em bawk a. Hetiang karah hian Carles Puyol chuan Messi chu hun rei tak la inkhel thei tura a ngaih thu hi a sawi chhuak a ni.
Carles Puyol chuan, “Lionel Messi hi kum 32 a ni mek a, amah anga player inenkawl tha hi chuan hun rei zawk an khelh theih a rinawm hle a. Leo pawh hian kum 38 a nih thleng pawhin pangngai takin a la khelh theih ka ring,” a ti.
“Eng vangin nge tunah Messi tel lohna Barcelona chungchang kan sawi mai ni? Amah ber hi a la awm a, tha takin a la khel thei reng bawk a, a awm loh hun tur tuna lo thlir vak vak hi a fuh lo. Tih theih ber chu a la tel ve lai hian theih anga tam chak tum ila a ni mai,” a ti bawk.
Lionel Messi chuan Camp Nou-ah season khat chu contract a la nei a, tun hnaiah Barcelona director Eric Abidal nen an inbat deuh nia sawi a awm a, hei vang hian hmun dang pan a tum maithei nia sawi te a awm chho mek a ni.
Vawi ruk ngawt Ballon d’Or dawng thei Messi hian a kum a tam ve tan tawh thu hi a lo sawi ve tawh a. Nikuma hemi chungchang a sawi chhuah hian inkhelhna hun a nei tlem ve tial tial tawh dawn tih thu pawh a sawi chhuak tel a ni.