12 Feb 2020 10:46

bakteaJr.

Mizo tlangval

​Messi hian Barca a chhuahsan thei: Ariedo Braida

Barcelona director hlui Ariedo Braida chuan Barcelona captain Lionel Messi chu Barca chhulchhuak liau liau ni mahse Camp Nou chhuahsan thei lo a nih loh thu a sawi.

Ballon d’Or paruk ngawt dawng thei Messi hi tun hnaiah Barca sporting director Eric Abidal nen inhmuhthiam loh deuhna an neih avangin Camp Nou chhuahsan mai tur anga sawi a ni a, mahse Messi hian Barca chhuahsan tumna a neih loh thu chanchinbu mite chuan an tarlang leh tawh bawk.

Messi hi Barca chhulchhuak liau liau niin club dang tan vawi khat mah a la khel lova, a career pum hi Camp Nou-a a hman zawh ringtu hi mi tam zawk an ni a tih theih awm e.

Messi hian tuna a contract neih mekah hian tun season zawh ruala a thlawn Camp Nou chhuahsan theihna a nei nia tarlan lo ni tawhin, Juventus, Manchester United leh Manchester City nen nasa taka sawizawm a ni.

Braida chuan kum 32 mi Messi-a chungchang sawiin, “Messi hi player tha chungchuang tak a ni a, Barcelona-ah hun ropui tak a hmang. Barcelona-ah hian kum 13 mi chauh a nih atangin a awm tawha, Barcelona-ah an chhungkuain an chenga, a tan chuan Camp Nou chhuahsan hi a har dawna, mahse thil thleng thei lo a ni lo,” a ti.

Tunlai football khawvelah Messi leh Juventus forward Cristiano Ronaldo-te chu footballer ropui ber an ni a, an pahnih hian Ballon d’Or 11 lai an la tawh.

Braida hian Messi leh Ronaldo-te hi khel dun thei an nih thu sawi zuiin, “Player tha em em mai an ni a, an khelh dun theih lohna chhan tur hi ka hre lo. An khel dun thei a ni,” a ti bawk.

Messi hi Barcelona-ah bak a la khelh loh avangin Barcelona tan chiah trophy a la chawia, Ronaldo erawh England, Spain leh Italy lamah te trophy hlu tak tak a chawi tawh thunga, mi tam tak chuan hei hi Messi aia Ronaldo an dah sanna pakhat a ni ti ila kan sawi sual tam kher lovang.