Sergio Busquets chuan Lionel Messi chu Cristiano Ronaldo aiin a famkim zawk daih niin a sawi a, Messi chuan mi tih ve ngai loh thil a ti thei niin a sawi bawk.

Barcelona midfielder Sergio Busquets hian vawi nga ngawt mai Ballon d’Or lo dawng tawh chu kawl mahse, hei vang ngawt hian UEFA Champions League title chu an kuta awm tur chiang sa a nih bik loh thu a sawi.

Catalan club lian hian UEFA Champions League quarter final-ah Premier League club lian Manchester United an hmachhawn dawn a. Quarter final lut thei tur hian Lyon chu 5-1 ngawtin an hneh a, hetah hian Lionel Messi chuan goal hnih a thun bakah a thiante goal thun tur vawi hnih a siamsak bawk a ni.

La Liga champion Barcelona hian Europe khawmualpuia inelna sang berah hian champion nih leh theih tawh an tum hle a, tun season-ah phei chuan an kawng daltu lian pakhat Real Madrid an tla tawh lehnghal a, hei vang hian an kawng chu a awlsam phah tura ngaihna a lian hle.

Busquets chuan, “Khawvela footballer tha ber kan nei a, mahse Champions League title kan la thei chuang lo a. A tha ber kan neih avang ringawt khan Champions League ah kan champion nghal ngawt thei bik chuang lo a. Tun season-ah pawh hian champion tura ngaih kan ni ngawt bik lo a ni,” a ti.

“Tun hnaiah Cristiano Ronaldo leh Lionel Messi te an khaikhin nasa hle a, ka tan chuan Leo tluka tha hi an awm lo chiang a. Ronaldo hi tha ve viau mahse Messi angin thiamna a nei tha tawk lo a, Messi hi chu a famkim bik em em mai a ni,” a ti bawk.

A sawi zelnaah, “Leo hi inkhelhnaah hian a inrawlh hnem bik hle a, mi dang thil tih loh hi tam tak a ti bik thin a. Cristiano pawh a chhe miah lo a, goal pawh a thun thei em em a, heti chung hian Messi angin a quality a sang em em lo deuh a. Tumruhna lamah te, goal thun lamah te erawh hi chuan Cristiano Ronaldo hi a chungnung zawk daih thung,” a ti.