Manchester City chuan an game hnuhnung berah Aston Villa chu Premier League inkhelah 6-1 laiin an sawpa, he inkhelah hian Argentine striker Sergio Aguero chuan hattrick siamin Premier League-a record ding lai pahnih a khum.

Aguero hian Premier League-ah goal 177 lai a khung tling tawha, British mi nilo Premier League-a goal khung hnem ber a nih bakah Premier League-a hattrick siam hnem ber a ni bawk.

Manchester City manager Pep Guardiola chuan Aguero chu a player enkawl tawha tha ber zinga mi ni mahse Barcelona-a a lo enkawl tawh Lionel Messi nen chuan huang khatah an awm loh thu a sawi.

Chanchinbu mite chuan Aguero chu a striker enkawl tawha tha ber a nih leh nih loh an zawta, Guardiola chuan, “Messi a tha ber. Messi hi chu no. 9, 10, 11, 7, 6, 5 4 tha ber a ni. Sergio pawh hi midang nena khaikhin chuan a tha ber zinga mi a ni a, goal thun hi a talent niin , ka lo sawi fo tawh thin angin goal khung hi a la thihpui dawn a ni,” a ti.

Guardiola hian kum 2008 atanga kum 2012 chhung Messi a enkawla, hemi hun chhung hi Barcelona ropui ber lai tia sawi ngam niin La Liga title pali bakah Champions League nomawi pahnih, Cope de Rey pahnih, UEFA Super Cup pahnih, Club World Cup pahnih leh Spanish Super Cup pali an chawi a ni.