Pele chuan football khelhpui atan Barcelona captain Lionel Messi chu a tan duhthusam a nih thu a sawi chhuak.

Brazilian legend Pele chuan Argentine forward Lionel Messi chu tunlaia football huangah chuan player duhthusam a nih thu a sawi chhuak a, khelmuala a khelhpui tur thlan chhuah tur ni ta se Messi chu a thlan tur thu a sawi.

Vawi nga ngawt Ballon d’Or lo dawng tawh Messi chu khawvela footballer ropui ber berte huangah a awm a. Mi tam tak phei chuan Pele leh Diego Maradona te ai pawhin an dah chungnung daih zawk a, khawvela footballer piang tawh zinga ropui ber ti hialin an sawi a ni.

Tun hnaiah Gazzetta dello Sport chuan Pele hi an kawm a, hetah hian 2019 a player pakhat thlang chhuak turin an ti a, Pele chuan, “Ka khelhpui turin player pakhat thlan tur a nih chuan Leo Messi hi ka thlang e,” a ti.

“Messi hi player tha chungchuang tak a ni a, a thiam em em a, a khelhpuite tan a tangkai a. Mi goal thun tur a siamsak nasa a, pass a nei hnem a, goal a thun thei hle a, dribbling lamah a ngaihtuahawm lo hle,” a ti bawk.

A sawi zelnaah, “Tunah hian Lionel Messi hi player famkim ber a ni a. Team pakhatah khel dun ngat ila chuan kan khelhpuite tan player pakhat mai ni lo, player pahnih ven ngun ngai em em kan awm ziah dawn a ni,” a ti.

Pele hian tunlai khawvelah Messi chauh lo pawh player tha tak tak an awm thu sawiin, world-class player dik tak erawh chuti takin an tam lo niin a sawi.

“Tun hma kha chuan ram pakhatah player tha deuh deuh pahnih emaw, pathum emaw kha an awm deuh zel a tih theih a. Eusebio, Antonio Simoes, Johan Cruyff, Franz Beckenbauer, Diego Maradona, Garrincha, Didi te leh a dang tam tak kha an awm thin a. Tun hnuah erawh player tha zual pahnih pathum vel bak sawi tur an awm lo a. Lionel Messi, Cristiano Ronaldo bakah Neymar te hi sawi tham deuh chu an ni mai awm e,” tiin Pele chuan a sawi a ni.