Wayne Rooney chuan inhnialna tawp thei loah a ngaihdan a sawi chhuak ve a, Lionel Messi chu Cristiano Ronaldo ai chuan a chungnung zawk nia a ngaih thu a sawi.
Manchester United forward hlui Wayne Rooney chuan tunlaia footballer ropui ber pawl pahnihte chu tluk thei tur an awm lo nia a ngaih thu sawiin, a thiam zawk thlan chhuah pawh harsa tak a nih thu a sawi a. Hetih rual hian an pahnih inkarah chuan Messi chu a dah san zawk thu a sawi a ni.
Rooney hi kum nga chhung chu Old Trafford-ah Cristiano Ronaldo nen an lo khel dun hman a. England forward hlui hian United tana a khelhpui thin aiin Argentine superstar chu a dah sang ta zawk a ni.
Professional football huanga hun a hman tan tirh lamah khan Cristiano Ronaldo chuan goal thun lampang kha a dah pawimawh vak lo thin niin Rooney hian a sawi a. Kawng hrang hranga a chhutin Messi em chu a tluk pha lo deuh niin a sawi chhuak.
“Kan khelh dun tan tirh lamah khan Ronaldo hian goal thun lampang kha a ngaihsak vak lo hle a. Khatiang hun lai atang khan khawvela player tha ber nih kha a tum em em mai a, kha kha a rilrua lian ber a ni,” tiin Rooney chuan a sawi.
“Theihtawp chhuahin a inbuatsaih reng a, a practise deuh reng mai a, a thawhrimna hi a tawpah chuan a lang chhuak chiang hle a. Cristiano taimak rah a lang a, player tha em em mai, goal pawh thun thei tak a rawn ni chho thei ta a ni,” a ti bawk.
A sawi zelnaah, “Cristiano leh Messi te hi khawvela footballer piang tawh zingah chuan a tha ber leh a ropui berte an ni chiang a. An pahnih inkarah hi chuan Messi hi a la chungnung hret zawkin ka hria,” a ti.
Lionel Messi chu club leh ram tan goal 1000 ah a inhnamhnawih tawh a, amah hian goal 703 a thun tawh a, mi goal thun tur vawi 297 chu a siamsak tawh bawk a ni.
Cristiano Ronaldo chuan goal 735 zet mai a thun tling tawh a, Serie A huangah goal 50 thun tling hma thei ber record a siam a. Europe khawmualpuia league lian pangaa title pathum la thei awm chhun a la ni.