20 Nov 2020 05:38

inkhel

Messi hi Barcelona Michael Jordan ni rawh se: Jordi Farre

Barcelona president nih tum Jordi Farre chuan Lionel Messi chu an club Michael Jordan ni tura a duh thu a sawi.

Kumin nipui transfer window inhawn lai khan Barcelona chhungkaw boruak a fuh lo chho hle a. Board member leh Lionel Messi te inkarah thil fel lo deuh a awm a, an inkarah khi a awm phah hial a ni.

UEFA Champions League lamah Barcelona chuan Bayern Munich chu 2-8 ngawtin an hneh lo a, he mi hnuah hian Lionel Messi chuan hmun danga chhuah a duh thu a sawi chhuak a. Hetianga a tawng chhuah hnuah phei chuan an club boruak a tha lo hman viau a ni.

Lionel Messi hian club thuneitu lamin a thianpa Luis Suarez hralh chhuah dan kawng an dap nasat avangin a lungawi loh thu a sawi chhuak a. An player pawimawh, senior player ni bawk heti tak maia nawr chhuah a tum avang hian Messi chu a thin a rim a, ama contract pawh tihtawp a duh thu a sawi chhuak hial a ni.

A hnuah Messi chuan a contract neih lai chu hman zawh a tum thu a sawi leh a, tun season tawp thlengin a contract neih lai chu a la dam dawn a. Chutih rual chuan khatih laia Barcelona president Josep Maria Bartomeu chu a sawisel nasa hle a, Bartomeu hian October thla tawpah khan banna a thehlut nghe nghe a ni.

Josep Maria Bartomeu a ban takah chuan a hmun ruak luah tumtu hi an awm nual a, heng zinga pakhat Jordi Farre chuan Messi chu Camp Nou-ah la awm zui tura a duh thu a sawi a. Tun dinhmunah chuan Farre ai hian Victor Font chu president ni thei tura rin kai a ni zawk a ni.

Jordi Farre chuan, “Lionel Messi hian he club hi eng dinhmunah nge min dinpui tih hi kan theihnghilh loh a tha khawp mai a. A nihna takah chuan Messi hi a dam chhung atan thuthlung ziahpui hial tlak a ni a. Messi hi Barcelona tana Michael Jordan ang vela kan siam a ngai,” a ti.

“He club tana dai thei tawh lo turin Messi hi kan dah a ngai a, amah pawh kan be tawh a, ruahmanna kan neih dan pawh kan hrilh hre tawh a. Sumdawnna lampanga dawr kan ni lo a, Messi hian sum tam tak a siam tawh a, tuna kan indawrna hi chu hmangaihna tel a ni tawh zawk a. Ruahmanna tha tak mai ka nei a, Messi rilru hi ka hneh theih ngei ka ring a ni,” a ti bawk.