Khawvela football club zawng zawngin Lionel Messi lakluh an duh kan ti a nih chuan dawt sawi kan ni ang. Turkish club Altinordu chairman Mehmet Seyit Ozkan chuan Argentina captain Lionel Messi chu a thlawn pawhin an duh loh tih a sawi mauh mai.

Altinordu hi Turkish second division club an ni a, an player zawng zawngte hi Turkish an nih vek bakah kum 21 leh a hnuai lam vek an ni. Ozkan chuan an player-te a rintawk thu leh Turkish player-te tana hun țha an pek tur thu a sawi.

"Messi hian hlawh nei loin Altinordu tan khelh duh pawh nise ka lalut chuang lo ang. Kan Turkish player naupangte hi ka ringtawk a, an tan hun țha ka siamsak a ni. Kan tum ber Super League khelh a, kum 2023-a(Altinordu kum 100 tlin kum) Europe a inlan hman a ni," tiin Messi aia Turkish naupangte a thlan zawk thu a sawi.

Messi thatzia leh ropuizia sawi nawn a ngai lo. Mi tam takin footballer piang tawh zinga țha ber an tih hian Ballon d'Or țum nga zet a dawng tawh a, khawvela club țha ber pawl Barcelona tana goal khung hnem ber a nih bakah football thiam ram Argentina tana goal khung hnem ber a ni bawk. Messi thiamna hre reng mahse Ozkan hian a hnampui leh player naupangte chawikan a ngai pawimawh hmasa zawk a ni.