Virgil van Dijk chuan Liverpool leh Barcelona an inkhelh hunah khawvela footballer tha ber Lionel Messi chu hmachhawn a hautak dawn tih sawiin, Messi chu dan vak ngaihna a hriat loh tur thu a sawi.

Liverpool chuan UEFA Champions League semi final an lut a, hetah hian Barcelona nen an inhmachhawn dawn a. May 1 khian Camp Nou-ah first leg an khel ang a, second leg chu May 7 khian Anfield-ah an khel leh ang.

Season hmasaa finalist te hian kuminah title lak theih ngei an duh hle a, European title nei thei tur chuan an hmaa ding sut tlang tur hi an huphurhawm hle a. Manchester United laka goal hnih thuntu Messi chu Liverpool tana hlauhawm ber tura ngaih a ni.

Champions League semi final-a an inkhelh hunah Dutch defender Van Dijk chu Messi dan tum turte zingah a tel dawn a. Messi vengtu nih chu thil hautak a nih zia hre chiangin, a tan Argentine superstar lo dan beh chu thil harsa tak a nih tur thu a sawi a ni.

Van Dijk chuan, “Eng tin chiah nge Lionel Messi hi ka lo dan ang tih hi ka la ngaihtuah thiam lo a, ngaihtuah vak ngaihna pawh ka hre lo. A hun lo thleng se, tih dan a awm ve mai tura ngai phawt ila a ni mai,” a ti.

“Kan inkhel tur chu a boruak a sang viau turah ngai ila, a huphurhawm rualin a nghahhlelhawm em em bawk a. Semi final kan thleng leh thei hi kan lawm tlang em em a, hetiang dinhmun kan din theihna chhan chu kan thawhrimna leh kan tanrualna avang liau liau a ni,” a ti bawk.

A sawi zelnaah, “Team game a ni a, mi pahnih khat chauh thil tih a ni dawn lo a, kei leh striker pakhat inbeihna a ni ngai hran lo. Keini leh anni inkar thil a ni tawp mai a, kan zavaiin kan tangrual ang a, result tha tak neih tumin kan bei dawn a. Kan hna hi a hautak dawn hle tih chu a chiang sa a, khawvela player tha ber Messi an neih avangin theihtawp tak meuh kan chhuah a ngai dawn a ni,” a ti.