Messi chungchanga Barcelona thuchhuah

08th June 2023, 10:06AM

Barcelona chuan an captain hlui Lionel Messi chu lakluh leh tum viau mah se an hlawhchham a, Messi hian Paris Saint-Germain a chhuahsan hnuah, Major League Soccer club Inter Miami a zawm dawn.

Barcelona hian Messi hi nasa takin lakluh an tum a, La Liga pawhin phalna pe vek tawh mah se, a tawpah Messi hian a hnara, Argentina captain hian a hma a lo paltlang tawh te paltlang nawn leh a duh tawh loh avanga Barcelona zawm ta lo a nih thu a sawi.

Messi-a’n Inter Miami a zawm tur thu a sawi hnu lawkah, Barcelona chuan thuchhuah siamin, “June thla ni 5, Thawhtanni khan, Lionel Messi-a pa leh a agent ni bawk Jorge Messi chuan, club president Joan Laporta hnenah Inter Miami zawm tura thutlukna an siam thu a hrilh a, Barca hian kan dawr a, lakluh kan duh a, Lionel Messi pawh rawn kir a duh a, mahse hetiang hian thutlukna an siam a ngai ta a ni.

“President Laporta chuan Messi-a thutlukna hi a hrethiamin a zah sak a, ama laka beiseisa a tlem deuhna league-a inkhelh a duh a, mi mit fukna ber nih a duh tawh lohna te pawh tun hnai thil a ni lo. Joan Laporta leh Jorge Messi te chuan he club tana mi ropui leh Barcelona-in a hmangaih em em Lionel Messi thlahna hun hmang turin inremna an nei bawk a ni,” tiin a sawi.

Messi hi Barcelona academy chhuak liau liau a ni a, kum 2004 atang khan Barcelona senior team-ah awmin, Barcelona-a a awm chhungin kum 35 mi hi a champion theihna zawng zawngah a champion kim hman a ni.

Copyright © inkhel.com 2024. All rights reserved.