Barcelona chuan Lionel Messi chu contract thar ziahpui tumin hma an la mek a, Argentine superstar hi football a chawlhsan hma chu Camp Nou a kawl reng an duh thu an sawi.
Kum 31-a upa Lionel Messi hi Barcelona chuan contract thar an la sihhmuh chiah lo a, a contract neih lai hi 2021 thlengin a la dam dawn a. Barca president Josep Maria Bartomeu chuan Argentine forward chu a contract a zawh hunah pawh contract dang ziahpui hi harsa vak tura a ngaih loh thu a sawi a ni.
Josep Maria Bartomeu chuan, “Leo Messi hi kan hnenah a awm zui zel ka ring tlat a, kan club player hlun a ni a, hmun dang pan hi a rilruah a awm lo a, a chawlh thlengin kan club-ah hian a khelh chhoh ngei kan ring hle a ni,” a ti.
La Liga hmahruaitute hian Messi mai bakah Jordi Alba pawh contract ziahpui an duh hle a, Alba pawh hi an hnenah hun rei tak awm thei turin contract hi ziahpui an rilruk a ni.
Jordi Alba hi Camp Nou ah first team player pawimawh pawl tak a ni mek a, full-back rinrawl hi Bartomeu chuan contract ziah belh turin a duh hle a ni.
Bartomeu chuan, “Jordi Alba hian kan hnena khelh chhunzawm zel a duh thu hi a sawi tawh a, keini pawhin a contract hi pawhsei ngei kan duh bawk a. Kum nga chhung awm belh leh turin contract hi kan sihhmuh a, hemi chungchangah hian kan inrem theih vat kan beisei,” a ti.
Tun season chhungin Barcelona hian trophy pathum beisei theih an nei mek a, La Liga title bakah Copa del Rey leh UEFA Champions League title la thei dinhmunah an ding mek a. Hetiang hi an dinhmun a nih laiin Bartomeu chuan manager Ernesto Valverde pawh chelh zui theih zel an duh thu a sawi tel a ni.
Barca president chuan, “Ernesto Valverde hian hmun dang a pan mai ka ring rih lo a, a player te hi a ring tawk a, helai hmunah hian season hnihna a hmang mek chauh a ni a, a la awm zui zel hi ka ring,” a ti.
“Kan tum ber chu tun season chhungin title lak theih apiang lak hi a ni a, he team kaihruai zel tur hian ka ring tawk hle a, eng trophy mah dawng dawn lo pawh ni ila ka rinna hi a tlakhniam phah lo ang a, kan team hi a enkawl zui zel tho ang,” a ti bawk.