Iranian mipa pakhat chu Lionel Messi nen an inang hle a, Barcelona captain nen an inanna hi hmang tangkaiin hmeichhe 23 zet mutpui tawh niin an puh a, hei hi amah chuan a pha nasa hle.

Reza Parastesh chu Argentine footballer lar Lionel Messi nen an inan em avangin ‘Iranian Messi’ tiin an sawi mai thin a. Tun hnaiah Spain rama chanchinbu lar Marca bakah social media velah Messi a an avangin remchangah a la a, hmeichhe 23 zet chu a mutpui tawh niin an sawi hlawm a ni.

Instagram-ah video a post a, hetah hian Reza Parastesh chuan, “Thiante u, tun hnaiah social media velah ka chanchin dik lo tak a thang mek a. Lionel Messi emaw min tih avangin hmeichhe 23 zet chu ka mutpui tawh niin an sawi nasa hle a. He chanchin hi thu dik lo a ni a, mi larna hi remchanga lak ka duh lo hrim hrim a ni,” a ti.

“Tuna an sawi ang hi a takah thleng se chu thuneitute hnena min hek pawh an awm tawh ngei dawn a, thubuai min siamsak ngei pawh ka ring a. Thu belh chian dawl lo mai a nih avangin min hektu an awm lo a, thubuai pawh ka nei lo reng bawk a. Min hektu awm ta se, a zia lo viau ang a, a zahthlak dawn bawk a. He chanchin hi a tak tak ni ta se tunah chuan tan inah ka awm daih tawh ang,” a ti bawk.

A sawi zelnaah, “Hmeichhia ka mutpui teuh anga thu thang hi awih duh reng reng suh u, thu dik a ni lo hrim hrim. Theihtawp ka chhuah ang a, dan behchhanin ka chanchin dik lo tak darh mek hi ka do let dawn a, ka hming an lo tihchhiat tawh hi siam that ka tum dawn a ni,” a ti.

Kum 26-a upa Parastesh hi tun kar tir lamah khan a chanchin darh mek hi an hrilh hria a, Messi lema chan pah hian hmeichhe thahnem tak a mutpui tawh nia an sawina chu dawt a nih thu a sawi ta char char a. A hming lo chhe tan tawh tihtawp theih dan kawng a dap nasa hle.

“Muslim ramah ka chanchin a darh chak si a, a pawi em em hi a ni ringawt a. Miin min nuihsawh a, min hmusit a, min dem a, min sawisel luai luai a, ka tan vanpui a chim a ni ber a. Ka chhungte pawhin min hmu tuihnai lo vek tawh a, mi reng reng hian min ten zo vek tawh maiin ka hria,” tiin Parastesh chuan a sawi.

Lionel Messi nen an inanna hi Reza Parastesh chuan a Instagram page tihlarna atan a hmang tangkai a, follower pawh a ngah chho tawh hle a, mi 7,00,000 vel zetin an follow mek a ni.

A Instagram page-ah hian Barcelona forward ang thei bera thla a lak thinte chu a post a, La Liga champion jersey te pawh a thenah chuan a ha nghe nghe a. Messi inkhel lai te leh press conference vela a awm lai te pawh a post tel nual a ni.

Reza hian Messi anga insiam a chin tanna pawh a pa vang niin an sawi a, a pa chuan Messi nen inang a tih avangin Barcelona jersey a haktir a, hemi atang hi chuan a chhunzawm chho ta zel niin a sawi a. A hmuihmul vel pawh Messi tih ang zelin a zuah ve ta mai niin a sawi.