16 Nov 2015 11:16

Inkhel

Mizo Sports Website hmasa ber

​Messi-a'n Premier League pan a tum ?

Chhiah awlrua puhna thubuai avangin Messi chu Spain-ah a buai ru hle, a theih tawpin insawifihlim tum mahse rorelna hmaa ding tura tih a ni ta thova.

Hengte a nih avangin Messi chuan Barcelona ngaina hle mahse Spain chhuahsan hrim hrim a tum niin dailystar chuan a tarlang a, La Liga a chhuahsan a nih chuan Premier League lam a pan dawn niin english media te chuan an tarlang chho mek.

World Footballer of the year vawi 4 lai lo ni tawh Messi-a'n Spain a chhuahsan maithei tih thawm a rik rualin Messi lei thei khawpa club hausa khawi English club ber nge a zawm ang tih chu media te chaw tui ber a ni nghal. English club lian zingah Manchester City, Manchester United, Chelsea leh Arsenal-te hming a ri ngal nuai mai.

Star-in a tarlan zel dan chuan Messi hian England a pan a nih chuan London-a khawsak a duh dawn a. Kum 28 mi hian chhiah pek tur zawng zawng nen kar khatah £600,000 lai hlawh a duh dawn. Barcelona-ah kum khat chhungin £14m a hlawh mek a, kar khat chhunga £600,000 lai a hlawh chuan kum khat chhungin £18m lai a hlawh hman dawn tihna a ni.

2001 atang khan Messi hian Barcelona lo club dang a la nei leh lo. A duh emaw duh lo emaw, Spain-a a dinhmun hian he Argentine forward hi a nawr chhuak nge nge dawn niin media te chuan an tarlang a, English club te an hausa tual taul bawk nen, Barcelona-in buy-out clause £175m lai an chhiar pawh pe ngam khawpa hausa an awm tak nawk avangin Messi hian club thar a neih ngei ring an awm mek a ni.

picture credit : Getty