Lionel Messi chuan record thar a la siam zel a, PSV Eindhoven nen an inkhelh khan goal a thun a, UEFA Champions League group phase bikah goal 65 a thun tling ta a, hetiang stage-a goal thun hnem ber record a siam a. Barcelona tan goal 567 a thun tling tawh a, Pele record a hnaih ve zel a ni.

Messi hian tun season-ah Champions League goal 6 a thun tawh a, Robert Lewandowski nen an goal thun zat a inang chiah a, goal thun hnem lamah hmahruaitu an ni mek a. Lionel Messi hian Torpedo Muller-a’n club pakhat chauh tana a goal thun zat chu a lehpel tawh a, Muller khan a hun laiin Bayern Munich tan goal 565 a thun a ni.

Messi hian tluk loh pakhat chiah a nei tawh a, Brazilian legend Pele aiin goal hi a la thun tlem daih zawk a. Pele khan a vanglaiin Santos tan goal 643 zet mai a thun tling a, Messi tan chuan Pele lehpel thei tur chuan goal la thun belh nual a ngai dawn a ni.

Europe khawmualpui bikah chuan Lionel Messi anga club pakhat chauh tana goal heti zat thun thei hi an awm lo a, Dutch club PSV Eindhoven nen an inkhelh a goal a thun khan team pakhat tan UEFA Champions League goal thun hnem ber a ni a, Barcelona tan Champions League-ah goal 106 a thun tling ta a ni.

Argentina superstar Messi hian Brazilian superstar Pele aiin goal 76 in a la thun tlem zawk a, tunah kum 31-a upa a ni tawh a, chuti taka thil awlsam a nih dawn loh rualin lehpelh theih loh erawh a ni lo thung.