Lionel Messi chuan World Cup 2026 a khel tawh dawn lo tih a sawi chiang dawt duh lo, a taksa a la fit that chuan a thutlukna la siam tur a nih thu a sawi.

2026 World Cup a nih meuh chuan Messi pawh kum 38 a ni ve tawh dawn a, World Cup hi United States, Mexico leh Canada-ah te khelh a ni dawn, World Cup laiin Messi hian kum 39 a tling dawn.

Qatar World Cup-a Semi final match an khelh zawh khan Messi chuan 2022 World Cup kha a World Cup hnuhnung ber a nih tawh tur thu a sawi a nih kha.

Hetih lai hian Messi hian International Football a la chawlhsan lo a, Copa America-ah pawh title humhim tumin a bei leh dawn.

Argentina-a a team-mate Alexis Mac Allister pawhin Messi chu World Cup 2026 khel leh tur leh, an team-in an la mamawh em em thu a lo sawi tawh a nih kha.

InfoBae-in a kawmnaah Messi chuan World Cup khelh leh chungchang a sawi a, a taksa dinhmuna zira thutlukna a la siam tur thu a sawi leh.

"World Cup khelh leh chungchang chu, ka taksa dinhmuna zir a ni tawh ang chu. Tharum ka la nei ang em? Ka team te ka la pui thei ang em? Tih zawng zawng ka ngaihtuah phawt ang.

"A la hla khawp mai, mahse hun hi a kal zung zung a, a lo thleng leh vat dawn. 2026 World Cup ka khel dawn nge dawn lo ka la sawi thei lo, ka team-mate te ka la puih theih leh theih lohah a innghat ang chu.

"Kum a lo tam hi chuan, tha pawh a thum ve tawh thin. Europe-a ka khelh lai ang ngawt kha ka ni tawh lo. Europe-a ka khelh lai kha chuan ni thum danah te tha takin kan khel thei kha a ni a," tiin Lionel Messi chuan a sawi.