Paris Saint-Germain chhuahsan tur Lionel Messi chuan a club hmangaih Barcelona-ah a kir dawn lo tih a sawi chiang a, Major League Soccer club Inter Miami a zawm dawn tih a sawi tel bawk.
Kum 35 mi hian tun thla ral rualin PSG-a a contract a hmang zo dawn a, contract thar a ziah dawn loh avangin Paris atangin a inpu chhuak dawn. Messi hi a club hlui Barcelona-a kir tur anga sawi ni mah se, USA lamah a insawn dawn ta zawk a ni.
Barcelona bakah hian Saudi Arabia lam atang pawhin Messi hian sum tam taka dawrtu a nei a, mahse Messi hi football chanchina sum tamna ber contract a hnawl niin chanchinbu mite chuan an tarlang.
Mundo Deportivo leh Sport in an kawmnaah Messi chuan, “Miami-a kal turin thutlukna ka siam fel tawh a, 100% chuan a la fel chiah lo. Barcelona-ah ka kir dawn lo rau rau a nih chuan Europe chhuahsan law law ka duh a, mi mit fukna ber nih ka duh lova, ka chhungkua hi ngaihsak lehzual ka duh.
“European team dang te pawhin min dawra, mahse ka bengkhawn lova, a chhan chu Barcelona-a luh ka duh a, a theih ta lo a nih chuan European football kalsan a duha, hei hi World Cup ka chawi hnua ka mamawh pawh a ni.
“Tunah chuan America-ah a career ka khar dawn a, MLS hi dan dangin ka hmachhawn dawn a, a hma aia nuam zawka hun hman ka tum. Chutih rual chuan chak duhna thinlung ka la nei reng a, ka mawhphurhna pawh a ni a, mahse rilru lam hahdamna a hma aiin ka nei tawh ang.
“Mi te mit fukna ber nih tawh rih loh ka duh a, ka chhungkua ngaihsak zual ka duh. Kum hnih liamta chhung khan chhungkuain harsatna kan tawk nasa a, nuam ka ti lo. Thla khat chhung nuam em em ka hmang thunga, World Cup ka chawi a, World Cup ka chawi chhiar tel loh kha chuan ka tan hun thim tak a ni,” tiin a sawi.
“Barcelona-a kir leh kha ka chak em em a, ka phur bawk a, mahse a hma a thil thleng ka ngaihtuaha, khatiang dinhmuna awm leh kha ka duh tawh lo. Player hralh an mamawh tih leh, player hlawh tihhniam an mamawh tih te ka hria a, khatiang zawng zawng kha paltlang leh ka duh tawh lova, ka hmalam hun mi kuta a awm tur kha ka duh tawh lo.
“La Liga khan phalna an pe tawh a, mahse ka kir leh kir loh ka kutah a awm tih erawh hi chu thu dik tawk lo a ni a, a chhan chu thil kim lo tam tak a awm. Contract chungchang kan sawi hman lo hrim hrima, indawrna chu a awm a, mahse official taka thil kalpui engmah a awm hman lova, ka kir thei dawn em tih pawh a chiang lo,” tiin Argentina captain chuan a sawi belh bawk a ni.