Lionel Messi chuan football a chawlhsan hun tur vel sawi mah se, a hun tak erawh a sawi chiang lo. Inkhelh nuam a tih tawh loh hunah chawlh a tum thu a sawi chhuak.

Kum 36 mi Messi hian PSG atanga Inter Miami a pan a, a club thar tan game 19 atangin goal 16 a khung tling. Inter Miami-ah hian kum 2025 thleng contract a nei.

Messi chu football a chawlhsan hun tur zawh a ni a, "Tha taka kan inkhelh theih tawh loh hunah emaw, inkhelh nuam ka tih tawh loh hunah emaw, ka team-mate te ka puih theih tawh loh hunah emaw football ka chawlhsan ang.

"Ka taksa dinhmun hi kei pawhin ka hrechiang ve em em a, ka that lai leh ka that loh lai ka hre bawk. Ka chawlh hun tur chu, ka kum lam a ni lo ang, ka taksain inkhelh nuam a tih chhung chu ka inkhel zel ang," tiin Messi chuan the podcast Big Time a hrilh.

Football a chawlhsan hunah eng nge a tih ang tih zawh a ni a, Messi chuan, "Tunah rih hi chuan ka la ngaihtuah lem lo. Football khelh hi nitin nuam ka la ti a, chu chu ka ngaihtuah ber a la ni rih e.

"Rei tak inkhelh zel chu ka la tum, chu chu tuna ka tum chu a la ni rih. Ka chawlh hunah chuan, thil eng emaw ka tui zawng chu ka ti ve ang chu," tiin Messi chuan a sawi bawk.

"United States ka pan hnu hian Tennis, Basketball leh American Football te hi hmuhnawm ka tiin ka tuipui," tiin Messi chuan tun hnaia game a ngainat thar a sawi chhuak.

2022 World Cup-ah khan champion lo ta se, International football a chawlhsan ang em tih zawh a ni a, Messi chuan, "World Cup kha chawi lo ilang chuan, international football ka chawlhsan ngei ang.

"A chhan chu club thar ka nei a, chumi lamah chuan ka rilru ka pek ka ring a ni. World champion nih hi chu a danglam khawp mai, kan dam chhungin kan nunah a bet tawh dawn a ni," tiin Messi chuan a chhang.