17 Oct 2020 01:48

bakteaJr.

Mizo tlangval

​Merseyside derby in hma kan sawn leh sawn loh a hril ang: Ancelotti

Vawiin tlai dar 5:00-ah hian Premier League inkhelah Merseyside derby kan hmu dawna, Everton chuan Goodison Park-ah Premier League champion lai Liverpool an lo mikhual dawn.

Merseyside derby kan hmuh tur hi kum tam tak hnua a phurawm ber tum tih theih a ni a, Liverpool hi champion lai an nih bakah, underdog zawk Everton tun Premier League season khelh meka che tha ber an ni.

Everton leh Liverpool te hian game li an khel ve ve tawha, Everton hi la chak fai vekin, point 12 neiin league hmahruaitu an ni meka, Liverpool hi vawi khat an tlawm tawha, vawi thum an chak tawh thunga, point 9 hlawhchhuak tawhin panganaah an awm mek.

International break hma chiah khan Liverpool hi an mualpho chiang hlea, Villa Park-ah Aston Villa chuan 7-2 ngawtin an lo sawpa, Merseyside derby-ah mualpho nawn an tum lo hle dawn.

Liverpool manager Jurgen Klopp chuan Merseyside derby an khelh tur chungchang a sawinaah Everton chu an tan challenger tha tak an nih thu a lo sawi tawha, Everton manager Carlo Ancelotti chuan Klopp-a tawngkamin a tihlawm thu a sawi.

Ancelotti chuan, “Klopp-a hnenah lawmthu ka sawia, Liverpool tana challenger nih theih hi kan tan pawh a tha hle. Mahse Liverpool hi an khel tha em em a, kan inhlat lutuk chuan ka hrelo nain, inhlat erawh kan la inhlat ve deuh.

“Liverpool lakah fiahna kan paltlang dawna, chutah chuan kan inhlat dan a hriat chiah anga, hma kan sawn leh sawn loh a hrilh ang. A tha ber an ni a, season hmasa pawh khan a tha ber an ni a, khawvela team tha ber pakhat an ni bawka, ka tan chona lian tak leh phurawm tak a ni,” a ti.