17 Oct 2020 07:33

inkhel

Merseyside Derby-ah chak zawk an awm lo

Goodison Park-ah Everton leh Liverpool te chuan Merseyside Derby vawi 237-na an khel a, team pahnihte hian goal hnih ve ve an thun a, chak zawk an awm lo.

Everton chuan an game hnuhnung bera Brighton an hneh tuma an khelhtir pakhat chauh an thlak danglam a, Tom Davies chu substitute bench lamah a awm a, Allan chuan bul a tan thung a. Carlo Ancelotti chuan tlar hnungah Yerry Mina leh Michael Keane te chu a dintir a ni.

Liverpool chuan Aston Villa an hneh loh tuma khel pali an thlak a, Alisson chu a la fit loh avangin Adrian chuan goal a veng a. Joe Gomez aiah Joel Matip chuan bul a tan a, Jordan Henderson, Thiago Alcantara leh Sadio Mane te pawhin bul an tan bawk a ni.

Everton (4-3-3): Jordan Pickford; Seamus Coleman, Yerry Mina, Michael Keane, Lucas Digne; Abdoulaye Doucoure, Allan, Andre Gomes; James Rodriguez, Dominic Calvert-Lewin, Richarlison

Subs: Fabian Delph, Gylfi Sigurdsson, Alex Iwobi, Bernard, Ben Godfrey, Tom Davies, Robin Olsen

Liverpool (4-3-3): Adrian; Trent Alexander-Arnold, Joel Matip, Virgil van Dijk, Andrew Robertson; Jordan Henderson, Fabinho, Thiago Alcantara; Mohamed Salah, Roberto Firmino, Sadio Mane

Subs: Georginio Wijnaldum, James Milner, Joe Gomez, Curtis Jones, Takumi Minamino, Diogo Jota, Caoimhin Kelleher

Inkhel tan hnu lawkah mikhual team lamin goal an thun nghal a, minute 3 chauh an la khel hman tihin Andrew Robertson ball pek chu Sadio Mane chuan a lo thun a, Liverpool chuan hma an hruai nghal der a ni.

Goal luh atanga rei vak lo, minute 8 velah Jordan Pickford leh Virgil van Dijk te ball chan tum inkhakah Dutch defender chu a inhliam a, Joe Gomez chuan a thlak a ngaih phah a.

Minute 19-ah James Rodriguez chuan ding lam sir atangin a laiah ball a vawrh phei a, hei hi Michael Keane chuan a lo tauh lut a, Everton si phurh chu a sut ve leh a. James Rodriguez hi tun season-ah Premier League goal 6 ah a inhnamhnawih tawh a, Harry Kane (9) leh Son Heung-min (7) te chiah tluk loh a nei a ni.

Everton tan tun season kal mekah Michael Keane hian goal 3 a thun ta chiah a, an team zingah chuan Dominic Calvert-Lewin (9) leh Richarlison (4) te chu a aia goal khung hnem awm chhun an ni.

Jurgen Klopp-a pawlte chu he inkhelah hian an chungnung zawk a, goal erawh an thun belh thei mai tawh bik lo a. Half time thlengin team pahnih hian goal an thun belh leh tawh rih lo a ni.

Second half an khel leh a, Liverpool chuan point 3 hlawh chhuah ngei an tum bawk a, an nawr chhunzawm leh nghal a. Hetih rual hian Everton pawhin tlawm zawk nih an tum lo bawk a, an duai bik lo hle.

Minute 72-ah mikhual lamin goal an thun leh a, a vawi hnihna atan hma an hruai leh a. Jordan Henderson chuan ding lam sir atangin ball a pet phei a, hei hi Yerry Mina chuan a lo pet chhuak fuh lo a, Mohamed Salah hmaah tlain Egyptian striker hian a lo thun a ni.

Mohamed Salah hian Liverpool tan inelna hrang hrangah game 159 khel tawhin goal 100 a thun tling ta chiah a. Reds tan Roger Hunt leh Jack Parkinson te chauh chu goal 100 thun tura Salah aia game khel tlem an ni.

Liverpool an lawm rei vak lo hle a, minute 81-ah Lucas Digne chuan vei lam sir atangin ball a vawrh phei a, hei hi Dominic Calvert-Lewin chuan Reds goal-ah a lo tauh lut a, an si phurh chu a sut ve leh a ni.

Hun tawp a hnai tawh a, minute 90-ah Richarlison chuan Thiago a tlawh a, referee chuan Brazilian star chu red card hmangin a hnawtchhuak zui a. Minute 93-ah Mane ball pek chu Henderson chuan a thun a, Liverpool chuan point 3 an hlawh chhuak ngei nia an hriat laiin Mane chu a lo offside vangin goal-ah an pawm ta lo.

Hun a tawp a, goal dang a luh belh tawh lo a, Merseyside Derby vawi 237-ah team pahnihte goal thun zat a inang a, point 1 ve ve an hlawh chhuak ta a ni.