Goodison Park-ah Everton chuan an hmelma Liverpool an mikhual a, Danny Ings goal chu Lukaku chuan rul lehin 1-1 in an inhnehtawk ta a ni.
Goal hnihte hi first half tawp dawna lut ve ve a ni a, James Milner-a corner pet tha zet chu changtu neilo Ings chuan hnai set sawt atangin a tauh lut a. First half tawp dawnah Emre Can clear chhe zet chuan Lukaku a per a, ani hian mawi lutukin a vei zawngin a pet goal chhunzawm. 1-1 in an inhnehtawk ta a ni.
Everton 1-1 Liverpool
(Lukaku 45′) (Ings 41')
PLAYER RATINGS (data source: eurosports)
Everton: Howard 7, Browning 7, Jagielka 8, Mori 6, Galloway 7, McCarthy 6, Barry 7, Deulofeu 6, Barkley 7, Naismith 7, Lukaku 7 .
Subs: Lennon 7, Kone 6.
Liverpool: Mignolet 8, Clyne 7, Skrtel 7, Sakho 6, Moreno 5, Lucas 6, Can 5, Milner, 7 Coutinho 7, Ings 7, Sturridge 6
Subs: Lallana 6, Allen 6.
Inkhelh hmain Brendan Rodgers-a dinhmun a derthawng niin media te chuan an tarlang. Merseyside derby-a an chak lo a nih ngat phei chuan an ban hial maithei niin an tarlang. Pressure sang tak nei chungin Goodison Park-ah an inkhel. Liverpool chuan goal an khung hmasa ta.
Ings goal kha chakpui duh viau mahse Lukaku goal hmangin 1-1 in an inhnehtawk ta a ni a. Liverpool hian goal dang khung belh duh hle mahse anmahni lamah a goal teuh thin hle zawk a. Mignolet chuan vawi hnih tha zet zetin first half-ah a save a. Set piece atanga Naismith-a tauh tha zet chu Mignolet hian ropui lutukin a save. Hemi hnuah James McCarthy shot tha lutuk a lo dang bawk. Second half-ah pawh Lukaku a dang bawk a ni.
Brendan Rodgers a vannei kan ti thei awm e. Everton hian an tlar hnung regular player Seamus Coleman, John Stones leh Leighton Baines-te chhawr thei lo mahse Phil Jagielka a khel tha hle a, English striker Danny Ings hi striker tha tak a nih zia kan hmu chho mek a, Liverpool an chet that em em loh pawhin goal a khung chho ta zauh zauh tlat mai.
Mual neituin 51% ball possession an nei a, shots vawi 14-ah shot on target erawh vawi 4 chiah an nei thung a. Liverpool lamhin shots vawi 13 an nei a, on target erawh vawi thum an nei. Fouls vawi 29 a awm a, yellow card vawi 6 phawrh a ni a, Lucas a vannei hle a, red card chawi thei dinhmunah ding mahse Martin Atkinson chuan yellow card pahnihna a pe lo hlauh. Kum dang Merseyside derby erawh a tluk lo deuh a ni.
Picture credit : Reuters & Getty