01 Nov 2020 07:59

inkhel

Mercedes team-in F1 record thar an siam

Lewis Hamilton chu Pathiannia Emilia Romagna Formula One Grand Prix ah pakhatna a ni a, a teammate Valtteri Bottas chu pahnihna a ni bawk a, Mercedes team chuan record thar an siam ta a ni.

Emilia Romagna Formula One Grand Prix ah hian Lewis Hamilton chuan pahnihna atangin bul a tan a, a tawpah erawh a thleng hmasa ber a. Pahnihna dinhmun hauhtu Valtteri Bottas aiin second 5.7 ngawtin a thleng hmasa a, Renault driver Daniel Ricciardo chu pathumna a ni.

Intlansiak tir lamah Max Verstappen chuan Hamilton a lehpel a, hma a hruai zet a. Intlansiak tawp lam, lap 11 chauh a awm tawh tihin Verstappen a che fuh lo a, a car ke a chhia a, hei vang hian Hamilton chuan hma a hruai theih phah a ni.

Hun tawp lamah hian Bottas chuan a teammate Hamilton chu lehpelh a tum hle a, safety car tlan chhuah laiin hun remchang a melh a, chuti chung chuan British driver chu a lehpel thei ta chuang lo a ni.

He intlansiakah hian Alpha Tauri driver Daniil Kvyat chu palina a ni a, Ferrari driver Charles Leclerc chu pangana a ni bawk a. Perez chu parukna niin, a hnungah hian Norris, Sainz, Raikkonen leh Giovinazzi te chu an awm bawk a ni.

Driver 15 chu a tawp thlengin an tlan a, a tawp thlenga tlan thei ta lo hi driver panga an awm a, Russell, Verstappen, Magnussen, Ocon leh Gasly te an ni.

Constructors championship-ah Mercedes AMG Petronas Motorsport chuan point 479 an hmu ta a, title an la thei ta a. Heti hian a zawnin title hi vawi 7 an la ta a, title la zawn rei ber record thar an siam a ni.

A hmain Ferrari chuan record an siam a, 1999 leh 2004 chhung khan a zawnin title hi vawi 6 an la a, hei hi Mercedes chuan an khum ta chiah a ni.

Driver zingah Hamilton chuan hma a hruai fal ta hle a, point 282 hmuin world title vawi 7 lak a hnaih tial tial a. Bottas chuan point 197 a hmu tawh a, pahnihna a ni mek a, a hnuai chiahah hian point 162 hmutu Max Verstappen chu a awm bawk a ni.

Constructor Standings

1. Mercedes AMG Petronas Motorsport - 479
2. Aston Martin Red Bull Racing - 226
3. Renault F1 Team - 135
4. McLaren F1 Team - 134
5. SportPesa Racing Point F1 Team - 134
6. Scuderia Ferrari - 103
7. Scuderia AlphaTauri Honda - 89
8. Alfa Romeo Racing - 8
9. Haas F1 Team - 3
10. Williams Racing - 0

Driver Standings

1. Lewis Hamilton, Mercedes AMG Petronas Motorsport - 282
2. Valtteri Bottas, Mercedes AMG Petronas Motorsport - 197
3. Max Verstappen, Aston Martin Red Bull Racing - 162
4. Daniel Ricciardo, Renault F1 Team - 95
5. Charles Leclerc, Scuderia Ferrari - 85
6. Sergio Pérez, SportPesa Racing Point F1 Team - 82
7. Lando Norris, McLaren F1 Team - 69
8. Carlos Sainz, McLaren F1 Team - 65
9. Alexander Albon, Aston Martin Red Bull Racing - 64
10. Pierre Gasly, Scuderia AlphaTauri Honda - 63
11. Lance Stroll, SportPesa Racing Point F1 Team - 57
12. Esteban Ocon, Renault F1 Team - 40