02 Oct 2019 08:41

inkhel

Mercedes F1 team sum hman dan

Mercedes Formula 1 team chuan tun hnaiah an sum hman dan an en chiang a, 2018 leh 2017 kumah te khan an sum hman zat chu a inang deuh thuak a ni.

F1 lawmman an dawn atang te, sponsorship leh an company bulpui Daimler AG atanga Mercedes team sum hmuh chu 2017 kumah khan £337.2 million niin, 2018 kuma an sum hmuh chu tlemin a pung ve hret a, £338.4 million a ni a. Kum hmasa lama an sum lak luh leh nikuma an sum lak luh inthlauhna erawh a tam tham lem lo hle.

Sum hi an hmang chhuak nasa viau bawk a, 2017 kuma an sum hman zawng zawng belh khawm chu £309.7 million niin, 2018 kuma an sum hman ral chu £311.4 million a tling bawk a. Chhiah pek hnua hlawkna an la neih zat chu £13.3 million niin an sawi.

An sum hman leh an lak luh zat hi 2016 leh 2017 ah khan a inthlau hle a, F1 dan siam thar vangin thil tam takah insen nasat a ngai tawh hle a, hei vang hian senso pawh a pun nasat phah a tih theih.

2017 leh 2018 kumah an pawisa hman zat a inang deuh thuak a, hei hian Mercedes team chu an sum hman tihpun nasat duh lo niin a ngaih theih a, a hmaa an inenkawl theihna ang zat vela la inenkawl zui zel chu an tum ber niin a ngaih theih a ni.

2021 atang chuan team tinte sum hman theih zat hi bituk a awm tawh dawn a, hemi hma hian Mercedes chuan an sum hman tihtlem tumin hma an la rih lo niin a lang a. Team lian zual pathumte chuan an hnuaia thawkte chu eng emaw zat an ban te pawh a ngai maithei a ni.

Tun hnai season thum chhungin thawktu awm zat pawh a pung chak viau a, 2016 kumah khan thawktute hi 849 vel an ni a, 2017 kumah 912 ah an pung chho a, 2018 ah phei chuan 968 zet an ni tawh a. Design, manufacturing leh engineering lampang atan nikumah 38 chu an lak belh a, administration lampangah 19 chu an lak belh bawk a ni.

2018 kum khan an hnuaia thawktute hlawh atan Mercedes chuan £93.7 million an seng a, a hmain £87.2 million an seng a, hlawh atana an sum hman punna hi £6.5 million zet a ni.

Daimler AG in team budget atana an dah hi 2018 kumah khan £64.3 million a ni a, a hma kum aiin £4 million velin an sum dah hi a pung a. Hetih rual hian team chuan £25.3 million chu an company thawhpui HPP tan an dah ve leh chhawng thin a, hei hi power unit an supply na man atan an ti a, Daimler sum dah chu £40 million aiin a tlem ta a ni.

Mercedes hian 2018 kumah khan TV lama F1 an tihlanna atangin 24% chu an hmu niin an sawi a ni.