Infiamna huangah chuan sum hrawm na em em, khawl thil lampang thiamna sang hmanga inelna tia sawi thin Formula One car hi lirthei kan hmuh thin te nen chuan a danglam hle a. Tun season chhunga Mercedes car hman tur steering wheel chinchang langsar zual thenkhat hi han thlir kual zuai zuai teh ang.

Mercedes in 2019 season a car an hman tur steering-ah hian button hmeh tur 25 ngawt mai awmin, switch leh control dang pawh a awm bawk a. Hmeh neuh neuh tur hi chi hrang hrang awmin, thumb-wheel switch, rotary switch leh tereuhte aeroplane-grade button an tih te chu a awm a. A hnuhnung ber aeroplane-grade button an tih hi chu hna thawhtir thei tur chuan na deuh taka hmeh a ngai a, tihsual thilthua hmeh palh pawha pawi khawih thei lo tura duan a ni.

Steering wheel hnuai lamah hian switch pathum a awm a, heng hi power setting lampang khawihna an ni a. Screen brightness leh engine setting te pawh hetah hian a tel nghal bawk a ni.

Kutzungpui hmanga khawih tura duan thumb-wheel switch pathum an vuah a, heng zinga pahnih chu kut veilama khawih theih tura dah niin, pakhat chu ding lamah a awm ve thung a. Heng switch pathum zinga pakhat, a ding lama mi hi differential hnathawh dan tidanglamtu atan an hmang a, a ke hnung nen a inkaihhnawih ber a ni.

A vei lama awm switch pahnihte chuan hnathawh hranpa an nei ve leh a, pakhat zawk chu engine brake niin pakhat leh chu brake balance tihdanglamna a ni ve leh bawk.

Button dang la awmte chu DRS tinungtu te, pitlane speed limit vawngtu te leh car engine ‘maximum power’ tinungtu tih vel te niin, neutral gear-a dahna te leh driver tana car inbiakpawhna radio hman theih tura tinungtu te an ni hlawm.

Season tir atanga a tawp thlengin Mercedes driver pahnih Lewis Hamilton leh Valtteri Bottas te chuan steering wheel pathum emaw, pali emaw an hman hmel a. Steering wheel pakhat siam nan hian darkar 80 vel zet hun hman a ngai thin a ni.

Tuna Mercedes in steering wheel an hman hi Brackley-a an factory ah an siam tlangpui a, carbonfibre, fiberglass, silicon, titanium leh copper hmanga siam a ni a. Steering wheel laiah display monitor awmin, hei leh circuit board te chu Mercedes siam a ni ve hran lo thung.

Hamilton leh Bottas te chu steering wheel design kawngah an inrawlh thuk hle niin an sawi a, driver pahnihte hian an tana hman nuam leh awlsam thei ang ber tura duan a nih theih nan an duh dan an sawi tel ve teuh reng a ni.