Lewis Hamilton chuan Pathiannia Belgian Grand Prix-ah khan Mercedes chuan Ferrari khawl chu an pha lo hle tih sawiin, Sebastian Vettel khan an tlan tan tirhah ‘awm ve lo’ ang maia awlsamin a lehpel niin a sawi.

Mercedes driver Hamilton chu Inrinnia qualifying an tlanin a che tha hle a, pole position a chang thei a. Pathiannia an intlansiakin kawi nganaah Vettel chuan Kemmel Straight-ah a lehpel a, Spa-Francorchamps intlansiaknaa kawng ngil thui deuhah chuan Mercedes hian Ferrari an pha lo thei hle a. Tun hnaiah Hamilton hian Mercedes car chu duhthu a sam lo tih a sawi fo tawh a, Pathianniah a thil sawi hi nem nghehi a awm a ni deuh ber.

British driver Hamilton hi Belgian Grand Prix-ah pahnihna a ni a, drivers’ championship-ah point 17 in hma a la hruai mek tho a. Lap hmasa bera Vettel a dang thei lo kha a pawi ber a nih thu sawiin, tun aiin an team khawl chu chak ta se result pawh a danglam theih phah dawn thu a sawi a ni.

Hamilton chuan, “Theihtawp ka chhuah a, tih theih ang zawng zawng chu ka ti vek a ni ber a. Kan che chhe lo viau a, mahse Vettel min rawn lehpelh lai khan awm ve lo ang vel ka ni,” a ti.

“Tun aia nasa zawk hian tan kan lak a ngai a, Ferrari chuan an car hi an thuam tha deuh reng a, Mercedes car chakna hi chuan a la pha lo hle tih a chiang a. Kan phak lohna hi kan chin fel vat loh chuan kan dinhmun kan siam tha thei dawn lo a. Rim takin kan thawk zel ang a, tun aia hma sawn zawk theih dan kan ngaihtuah a ngai a ni,” a ti bawk.

A sawi zelnaah Hamilton chuan Ferrari car a chak bik em emna chhan chu an hybrid system vang a nih a rin thu a sawi a, an car V6 turbo engine chu a puibawm tha viau nia a hriat thu a sawi.