Formula One world champion Mercedes chuan 2020 season-ah an driver Valtteri Bottas chu an la kawl chhunzawm zel dawn.

Bottas-a contract hi zo dawn tawh mahse Mercedes chuan an reserve striker Esteban Ocon kaisan tir aiin Bottas-a contract hi an pawtsei ta zawk.

Ocon hian Mercedes reserve-a kum khat hun a hman hnuah Renault a zawm ve thung.

Mercedes team boss Toto Wolff chuan Bottas-a contract an pawhsei chungchang sawiin, “Kumin khan Bottas hi nikum aia che tha turin kan beisei bakah kan phuta, kan beiseina ang leh phutna ang chu a rawn ti hlawhtling chiang hle, tunah a contract kan pawtsei ta a ni,” a ti.

Finnish driver kum 30 mi Bottas hian kum 2017 khan Mercedes a zawma, tunah hian championship-ah pahnihna niin, point 62-in a team-mate Lewis Hamilton a pha lo mek.

Tun season-ah Bottas hian pole position vawi li a luah tawh a, Hamilton nen an inang chiaha, tunah hian Belgian Grand Prix-a tlan turin an inbuatsaih mek. Bottas hi tun season-ah race pahnihah a chak tawha, a team-mate Hamilton erawh pariatah a chak tawh thung.

Bottas chuan, “Season lina atana Mercedes-a ka awm thei tur hi ka lawmin ka inchhuang em em a, Mercedes member zawng zawng leh board-te hnenah hian ka chunga rinna an nghah avangin lawmthu ka sawi a ni,” a ti.