La Liga champion lai Real Madrid chuan UEFA Champions League round of 16 first leg inkhelah Italian club Atalanta chu Atleti Azzurri d’Italia-ah an tlawha, si khat faiin Real Madrid an chak.

Inkhela goal awm chhun hi Real fullback Ferland Mendy-a khung a ni a, 17mins khelh a nihin Atalanta midfielder Remo Freuler chu hnawhchhuah a ni.

Atalanta 0-1 Real Madrid

(Mendy 86’)

Player Ratings

Atalanta: Gollini (7), Toloi (8), Romero (7), Djimsiti (7), Maehle (6), De Roon (6), Freuler (3), Gosens (6), Pessina (6), Zapata (6), Muriel (6) Subs: Pasalic (7), Ilicic (6), Malinovsky (N/A), Palomino (N/A)

Real Madrid: Courtois (6), Vazquez (6), Varane (6), Nacho (7), Mendy (8), Kroos (6), Casemiro (7), Modric (7), Asensio (5), Vinicius (6) Isco (5) Subs: Mariano (5), Arribas (N/A), Duro (/A)

Inkhel an tana 20mins pawh khelh tlin a nih hma in Atalanta hi player 10-a an khelh a ngai nghal; Isco chuan Mendy ball pe in, Mendy hian box chhungah ball luh pui tum mahse Freuler chuan Mendy hi a titlu a, referee chuan Swiss midfielder Freuler hi direct red card a pe.

Referee-in Freuler hi direct red card a pe mai hian zawhna a ti tam angrenga, Mendy hi hlauhawm takin a titlu hran lova, Mendy hi last-man a ni lo bawk nen, referee-in direct red card a pek chhan hi hriatthiam a har hle.

Half time hma chiahin Toni Kroos chuan box chhungah ball a vawrh luta, Casemiro chuan lo tauh mahse Gollini a pera, hei hi first half-ah chance tha ber a tih loh theih loh.

Second half tir teah Real hian hma an hruai teuh hle a, Luka Modric chuan box chhung chiah atangin a ke dinglamin goal-ah ball a shoot a, tlem lo khawih per niin, teuh viau mahse a goal lo chiah chiaha, Real tan a uiawm hle.

0-0 in an inhnehtawk mai dawnin a lang hman rum rum tawh tihah Real hian goal an khunga, French left-back Mendy chuan hun tawp hnaih lamah a ke hman thiam loh lamin goal-ah ball a chhuih luta, hei hi Real chuan an chakpui zui ta a ni.