22 Aug 2019 05:18

inkhel

Media vangin Giannis ka tluk lo: James Harden

James Harden chuan media zarah 2018-19 season-ah Giannis Antetokounmpo chu NBA MVP atan an thlan phah niin a sawi.

Houston Rockets guard James Harden chuan regular season-ah average 36.1 a nei a, hei hi 1986-87 season-a Michael Jordan average aiin hniam hret mahse, hemi hnua average sang leh ber a ni a. Hei mai bakah hian game 32 chhung chu a zawnin point 30 a thun tling ziah bawk a ni.

Harden chu che tha viau mahse Milwaukee Bucks player tha bera an thlan Giannis Antetokounmpo chu NBA MVP atan an thlang zawk a. Antetokounmpo hian average 27.7 points, 12.5 rebounds, 5.9 assists, 1.5 blocks leh 1.3 steals a nei a ni.

“A tir atang khan engkim a chiang nghal vek a tih theih a, media khan kawng an sial nasa hle a. Kum tir atangin hma an la tawh a, khatiang kha chuan kha kawng tawpna hmun tur kha a chiang nghal vek a ni,” tiin Harden chuan a sawi.

“A nihna takah chuan season tan tirh atangin media te chuan tu emaw chanchin kha an uar fal bik hle a, kum tluanin tan an la a, season tawp thlengin thur chhuah nasat bik kha an nei a. Khatiang kha chuan thil dang kha a kawk tawh lo reng reng,” a ti bawk.

A sawi zelnaah, “Ka tan chuan engmah tih theih a awm lo a, ral khat atanga lo thlir chiah kha ka tih theih awm chhun chu a ni. A nih dan kimchang leh lutuk chuan thil sawi chi a ni hran lo a, ka tih ve theih ber chu ka hmabak tha taka hlen chhuah kha a ni mai,” a ti.

“Kan inkhelhin theihtawp ka chhuah a, ka theihna zawng zawng ka sawm khawm a, result tha tak nei thei turin tan ka la thin a. Mi tam tak chuan point engzat nge ka score theih dawn tih an lo ngaichang thin. Tun dinhmunah tih theih ka ngah lo hle a, ka tih theih ve ber chu season lo awm leh turah pawh ka la tel zel dawn a, a hma zawng aia tha lehzual nih ka tum a. Title pawh lak ngei ka duh hle a ni,” a ti bawk.

Rockets chuan Chris Paul chu Oklahoma City Thunder lamah an kaltir a, 2017 MVP Russell Westbrook chu an la lut ve thung a. Hetiang boruak te avang hian James Harden chuan season tan hun a nghahhlelh thu a sawi.