Dana White chuan UFC 249 chu neih ngei an la tum reng thu sawiin, a hmun sawi lan rih loh mah ni se coronavirus vanga thulh an la tum loh thu a sawi a. A tul a nih chuan media tel miah lo pawha kal tlangpui a nih tur thu a sawi.

UFC 249 chungchangah hian sawi neuh neuh a tam chho hle a, coronavirus darh mek avangin mi tam tak chuan an thulh mai an rin thu an sawi hlawm a. Hetiang karah hian UFC president Dana White chuan thulh tumna an neih loh thu hi a sawi a ni.

Khawvel hmun hrang hrangah infiamna chi hrang hrang chu hri leng mek vang hian an thulh tawh hlawm a. Hetiang a nih laia UFC 249 kal tlangpui tumna a la awm chu media thenkhat chuan an sawisel a, hei hi Dana White chuan a chhang let a ni.

Ruahman lawk danah chuan UFC 249 main event-ah Khabib Nurmagomedov leh Tony Ferguson te chu insual tur an ni a. A hmain anni pahnih hi insual tura tih an lo ni nual tawh a, vawi 4 ngawt mai an lo thulh tawh a, a vawi 5-na tur pawh thulh thei dinhmunah a ding mek bawk a ni.

White chuan a vawi 5-na chu tihpuitlin ngei an tum tawh thu sawiin, entu awm loa tih erawh a ngaih tur thu a sawi a. An tihna hmun tur hi an la puangzar chiah lo a, ruahmanna erawh an siam fel thawkhat tawh niin a sawi chhuak.

“Engkim ka hre chiang vek a, media chu engmah ka hrilh dawn lo. Media hnenah hian engmah sawi ka tum lo a, ka tum loh chhan pawh zingah chanchinbu han chhiar ila, chanchinthar han en ila, thu dik lo tak tak hmuh leh hriat tur a awm teuh ringawt zel,” tiin Dana White chuan a sawi.

“Thu ho mai mai an chhuah vak vak ringawt a, hei vang hian April 18 ah pawh an rawn tel duh kher lo a ni thei a. A nihna takah chuan entu an awm dawn loh avangin an duh leh rawn inlan lo tawp mah se a pawi lo. Media tel lo pawhin UFC 249 hi kan ti tho ang,” a ti bawk.

Dana White hian UFC London, UFC Columbus leh UFC Portland te chu thulh a nih thu a lo puang tawh a, chutih laiin UFC 249 erawh a thulhtir ve duh lo thung a ni.