28 Jan 2019 02:28

inkhel

Medal lawm hun chhawng hnih hman a ni

Mizoram State Sports Council chuan January ni 28, Thawhtanni chawhma dar 11:00 khan Mizoram aiawha fehchhuakte medal 70 zet mai lawmna hun a hmang.

Medal lawmna hun hi chhawng hniha neih a ni a, hun hmasaah Mizoram Karate team lawmna hun hman a ni a, hemi hnu hian Mizoram Muaythai team lawmna hun hman zui a ni.

Jannuary ni 21 -23, 2019 chhung khan Dentam, West Sikkim-ah North East Youth Festival & 2nd North East Muaythai Championship 2019 neih a ni a, Mizoram Muaythai team chuan gold 15, silver 6 leh bronze 7, a vaiin medal 28 an la a, a pumpuiah palina an ni. A thlengtu Sikkim chu team champion an ni a, gold 22, silver 12 leh bronze 6 an dawng a, pahnihna Meghalaya chuan gold 22, silver 5 leh bronze 5 dawngin pathumna Tripura chuan gold 16, silver 19 leh bronze 10 an dawng ve bawk.

Mizoram Muaythai team lawmna huna khual lian Pu C.Laltlanthanga, Secretary, MSSC chuan, " Infiammite hi kan vannei a, tam takin kan hmuh phak loh tur India ram leh khawvel ram hrang hrangahte kan zin theih phah a ni" a ti a. "Infiammite chu kan taksa, rilru leh thlarau a hrisel tur a ni a. Kan hotuten tih tur an tuk piah lamah nasa zawka hlawhtling tura kan beih a ngai. Vawiinah bronze ka lak chuan a lehpek a, silver tal, vawiinah silver ka lak chuan a leh pekah gold lak ngei kan tum tur a ni. Hmasawn tum lo tan infiamnaah hmun a awm lo" tiin Mizoram Muaythai player-te a fuih a, an kal zelna turah duhsakna a hlan.

Mizoram team manager H.Lalmuanpuia chuan " State dangin player an tir hnem a, weight category atam avangin kal hnem ten medal an la tam zel. Players kal dan atanga chhut chuan Mizoram kan titha ber a ni" tiin sum leh paia tanpuitu Mizoram State Sports Council chungah lawmthu a sawi.

NE Muaythai Championship-a Event Commissioner Samuel Lalrozama pawhin thu sawiin, " Hmarchhak huap festival a ni a, chutah chuan championship pathum - Muaythai, Karate leh Taekwondo inelna a awm a, Muaythai inelna a lian ber a, players pawh 400 vel an tel thei. Asian Games leh Olympic-ahte Muaythai Game sengluh a nih theih nan hmalak mek a ni a, International championship awm turah Mizo player atam thei ang ber kaltir tum a ni" a ti ve bawk.

January ni 10-12, 2019 chhung khan Thimphu, Bhutan-ah Bhutan Internationals Open Karate Championship chu neih a ni bawk a, Mizoram Karate team-te medal 42 nen an lo haw.

Bhutan Internationla Open Karate Championship-2019 ah hian Mizoram Karate Team te chuan Gold - 32, Silver - 6 leh Bronze - 4, avaiin medal 42 an dawng a. Mizoram team lawmpuina hun Pu H.Thangchungnunga, SPO kaihhruaina hnuaia neihah khual lian Pu V.Lalzawmliana, Vice President, MSSC chuan, " Karate team hlawhtlinna ka lawmpui a, kum 2020 Summer Olympic Games-ah he inelna hi a tel dawn avangin Mizo players engemawzat chu India aiawh ni pha ngei turin kan beisei dawn che u a ni" a ti.

Mizoram State Sports Council chuan Muaythai leh Karate team-te thingpui inpuiin players leh officials te hnenah a tih thin danin lawmpuina thilpek a hlan leh theuh a ni.