Ramadan lai a ni bawk a, Manchester United star Paul Pogba chuan Muslim hmun thianghlim a tlawh a, Mecca ah a kal tih hi social media lamah thlalakin a lantir.

Kum 25-a upa Pogba hian season zawh hnu, World Cup tan hma siin hun remchang a nei bawk a, Mecca hi a pan ve ta a. France chuan World Cup atana an inpuahchah hmain player te chu kar khat chawlh an pe a, hemi remchangah hian Muslim hmun thianghlim hi Pogba chuan a tlawh a ni.

Saudi Arabia a pan tih tichiang turin Pogba hian a hnunga an hmunpui lang thei ngei turin video in thla a la a, hei hi social media lamah a post zui bawk.

Pogba chuan, “Helai hmuna kal lo chuan an hrethiam ve dawn lo a, a mawi a, mawi tak hi a ni ringawt a, a nuam em em bawk,” a ti a.

“A nawm em avangin la kal ve lo zawng zawng chu kal ve vek turin ka duhsak a, a nawm dan te, a mawi dan te hi ka sawi fiah thiam lo a, mahni ngei kal ve mai chi a ni,” a ti bawk.

Nikum khan Pogba hian Hajj a lo chhim tawh bawk a, Manchester United in Europa League final-ah Ajax an hneh hnu lawkah Mecca hi a pan a. Kuminah erawh trophy dawng loin Hajj hi a chhim thung.

France manager Didier Deschamps chuan Russia rama FIFA World Cup khelh turah an ram aiawh a thlang tha hlawm hle a, mi tam tak chuan an champion an ring nghal a ni.