September ni 10, Thawhlehni khan Aizawla Indoor Stadium hrang hrangah Inter Departmental Sports (MCSS & CA Annual Sports Meet) 2019 khelh tan a ni a, Ramhlun Indoor Stadium-ah hawnna inkhawm chawhma dar 11:00 khan hman a ni. A hawnna inkhawmah hian Pu JC Ramthanga, Addl.Chief Secretary chu khual lian a ni.
MCSS&CA Annual Sports Meet 2019-ah hian intihsiakna hrang hrangah players 504 khel turin an inziaklut a, discipline hrang 5 - Badminton, Chess, Volleyball (Hmeichhia), Table Tennis leh Carrom-ahte inelna neih a ni.
Hawnna huna khual lian Addl.Chief Secretary Pu JC Ramthanga chuan, " Mizoram sawrkar hnuaia department hrang hrang inelna kumtin buatsaih a ni thei hi a lawmawm takzet a, sports-ah Mizoramin hma kan sawn kan tih rualin sawrkar hnathawkte pawhin hetiang hun hi kan buatsaih ve reng a tul a. Hei hian inpawhna tha leh thawhhona tha tak min pe thin a, chuvangin zawngchhang tlak tak a ni a ti. Khual lian chuan sawrkar hnathawkten conduct rules tha tak kan neih angin dan hnuaiah dik leh fel taka infiamna hun kan neih a pawimawh a ni a ti bawk.
Inter Departmental Sports Meet-ah hian Mizoram sawrkar hnuaia department hrang hrang an tel thahnem hle a, Secretariat & Allied thawkho chuan players an thawhchhuak hnem ber a, players 69 telin Department intelkhawm dang G-19 chuan players 51 an thawhchhuak a, Education Department chuan players 35 thawhin SALT atangin players 31, PHE & SIPMIU atangin players 42, Health Department atangin players 36, PWD atangin players 28 an tel a, heng department te hi players thawhchhuak hnem zualte an ni.
Opening Function neih zawhah Lalrampari, Chief Coach, SYS kaihhruainain department hrang hrang aiawhten Oath taking an nei a, inelna hian tunkar zirtawpni thleng a awh ang.
Mizoram sawrkar hnathawk inelna Inter Departmental Sports hi vawi 32 buatsaihna a ni a, Ramhlun Indoor Stadium-ah Badminton leh Carrom inelna neih a ni a, Bawngkawn Indoor Stadium-ah Badminton, Electric Veng YMA Hall-ah Volleyball (Hmeichhia) leh Chess, MTTA Hall, Kawltheihuan, Mission Vengah Table Tennis inelna te neih a ni.
Niikum khan R.Dengthuama Indoor Stadium, Mualpuiah neih niin a pumpuiah Police Department pakhatna an ni a, Education Department pahnihna niin P&E Department pathumna an ni.