​McGregor nena tehkhin chi ka ni lo- Mayweather

18th November 2016, 03:11AM

Pound for Pound boxer ropui ber? Floyd Mayweather chuan tun hnaia thawm nei lian MMA fighter Conor McGregor nena tehkhin a ni chu a duh loh thu sawiin sai leh fanghmir an tekhin ngai loh thu a sawi.

Mayweather hian boxing a khelh chhungin hneh loh a tawng lo a, inhnek a hmachhawn 49-ah hnehna chang vekin weight division pangaah world champion a ni thei bawk. Hneh loh nei loa boxing a chawlhsan hnuah pawh thawm a la nei lian hle a, Irish fighter tawngkam thlahdah ve tak McGregor nen tawngkamin an inbei nasa hle.

McGregor a duai bik lo a, UFC a luhchilhna kum 5 em pawh a tling hmain UFC history a siam thei a ni. McGregor hi UFC chanchina a ruala weight division pahniha champion belt kawl kawp thei awmchhun a ni a, Featherweight champion a nih hnuin UFC 205 khan Lightweight champion ni turin round khatnaah Eddie Alvarez a hneh leh bawk.

McGregor chungchang sawiin Mayweather chuan, "MMA Floyd Mayweather in ti maw? McGregor hian zan khatah $300m a hlawhchhuak ve tawh em? Kum 20 chhung MMA-a ro a rel ka hre lo a, weight division pangaa a champion pawh ka hre hek lo. Zan khatah $100m emaw $70m pawh a la hlawhchhuak hek lo. McGregor hian a hna chu thawk mai rawh se, nimahsela kei nen chuan tehkhin chi a ni lo. Min zah lohna lian tak ni. Sai ka ni a, sai chuan fanghmir a cho ngai lo. Sai hi chu a len em avangin fanghmir mai mai a hmu thei lo," tiin McGregor nena tehkhin a ni chu a duh lo hle.

McGregor a ngawi mai mai bik hauh lo, Irish fighter hian mipa insual dik takah Mayweather hian a cho lo tih sawiin boxing dan anga an inbei dawn a nih chuan $100m a duh thu a sawi.

Copyright © inkhel.com 2024. All rights reserved.