26 Sep 2020 04:37

inkhel

McGregor nen kan inhnek ngei dawn: Pacquiao

Manny Pacquiao chuan kum tharah Conor McGregor nen chuan Middle East lamah an inhnek ngei dawn niin a sawi chhuak.

UFC star Conor McGregor chuan boxer ropui Manny Pacquiao nen kum thar lamah Middle East-ah an inhnek dawn tih thu a puang tawh a, ngaihventu pawh an tam nghal viau mai a. Mi tam tak chuan hei hi thil thleng tak tak tur a nih an ring zo chiah lo a, heng karah hian Pacman chuan an inhmachhawn ngei dawn niin a sawi chhuak a ni.

Tun hnaiah Conor McGregor chuan UFC a chawlhsan thu a puang a, tun tum hi kum li chhunga chawlh a puan vawi thumna niin, a hmaa vawi hnih a puan tawh hnuah octagon chhungah a kir leh ve ve a ni.

Pacquiao te chuan thu chhuah an siam a, “Filipino COVID-19 tuartute pualin Senator Manny Pacquiao chuan kum tharah khian Conor McGregor a hmachhawn ang,” tiin an puang.

“Manny Pacquiao leh Conor McGregor te inhmachhawnna atanga sum an hmuh tam tak chu Philippines rama coronavirus vanga harsatna tawkte tanpuina atan hman a ni ang,” an ti bawk.

Conor McGregor chuan Twitter lamah UFC chawlhsan a tum chhan te a sawi chhuah bakah Dana White nen an inbiakna thenkhat chu a tlangzarh bawk a ni.

Irish fighter chuan a theih anga tam insual a duh thu sawiin, hetiang hun hi an siamsak a beisei laiin entu mipui awm theih hun nghak hram tura an tih thu a sawi a. Amah hian Justin Gaethje leh Diego Sanchez te nen pawh insual theih a duh laia lo la nghak tura an ti chu a ngaihdan a nih loh thu sawiin, chawlh puan mai kha a thlang ta niin a sawi.

“Ka nghak rei tawh a, insualna hun min pe tura ka ngenna pawhin awmzia a nei lo a, chawlh mai kha thain ka hre ta a. Middle East lamah Manny Pacquiao nen kan inhnek dawn a ni tawp mai,” tiin McGregor chuan a sawi a ni.