Triple H chuan UFC superstar pahnih Conor McGregor leh Daniel Cormier te chu WWE lama lut tura a duh thu a sawi.

Professional mixed martial artist thenkhat chuan UFC lamah hun hlawhtling tak an hman hnuin WWE an lo luhchilh tawh a. Chutiang deuh bawk chuan WWE huang chhuahsana UFC lama lut pawh an awm tawh bawk a ni.

Ronda Rousey leh Matt Riddle te chuan MMA lam an chhuahsan a, entertainment wrestling khawvelah hun an hmang a. Lehlamah Brock Lesnar leh CM Punk te chu entertainment wrestling huang atangin an chhuak a, MMA khawvelah an inhmang ve bawk a ni.

WWE champion hlui, Global Talent Strategy & Development for WWE Executive Vice President ni mek, Triple H tia kan hriat lar, Paul Michael Levesque chuan UFC mihrang pahnih Conor McGregor leh Daniel Cormier te chu WWE lama thlem luh a tum thu a sawi a ni.

TMZ Sports hnenah Triple H chuan Daniel Cormier chu a biak tawh thu sawiin, UFC heavyweight champion thin chu eng ang chiah nge a sawipui tih erawh a sawi chiang lo thung.

“Daniel Cormier hi ka duh hle a, tun hma pawhin kan inbe nasa ve thei khawp mai a. A hma atang tawhin thil kan tih dun theih tur te kan sawi thin a, WWE huanga a tih ve theih tur thil chi hrang hrang chu ka sawipui tawh a ni,” tiin Triple H chuan a sawi.

“Thil kal dan a fuh a nih phawt chuan Daniel hi eng emaw tak chu kan la tihpui lo ang tih a sawi theih loh a, UFC leh Dana White te nen inzahtawn tak chungin hma kan la lo ang tih hi a sawi theih miah lo a ni,” a ti bawk.

A sawi zelnaah Conor McGregor chu WWE huanga lut tur chi tak nia a rin thu sawiin, a tawng theihna te, mipui a hip theihna te, a insual thiamna te chu tangkai taka hman theih vek a nih thu a sawi a ni.

Fiamthu deuh pahin Triple H chuan, “McGregor hi WWE lama a rawn lut a nih ngat chuan Vince McMahon nen ‘Billion Dollar strut’ hmuh theih ngei a beiseiawm khawp ang a. Chutiang a thleng thei a nih ngat chuan duhthusam a ni ang,” a ti.