American boxer tawngkam thlahdah ve tak Floyd 'Money' Mayweather chuan boxing a chawlhsan zet hnuah Irish fighter Connor McGregor hmachhawn tura a lo kir leh tak thu a sawi. Khawvela pound for pound boxer awm tawha ropui ber pawl Mayweather hian boxer 49 a hmachhawn hman a, hneh loh nei loin boxing khawvel a chhuahsan a nih kha.
Tun hnaiah Mayweather leh McGregor-te'n chanchin an ngah hle a, incho tawn viau mahse inhnek turin an inbe fel hleithei lo. Mayweather-a'n a duh duh hmachhawn thei mahse McGregor erawh UFC hnuaia contract nei lai a ni a, UFC President Dana White pawmpuina tel lo chuan Mayweather a hmachhawn ngawt thei lo.
Mayweather chuan, "Tunah chuan inhnek turin ka lo kir leh ta e, McGregor hmachhawn tur chauhin a ni ang. Sum lam emaw UFC vanga chhuanlam siamna hi ka hre peih tawh lo. June thlaa kan inbeih theih nan UFC nen hian inbe fel vat rawh u, thil awlsam lutuk a ni. A chan tha zawk ka ni a, nang erawh a chan chhe zawk i ni. Sum lam avanga buaina neih reng hi ka ning a, min beih i duh tak tak a nih chuan tihfel ngai chu tifel vat mai rawh," tiin McGregor nena June thlaa inbeih hman a duh thu a sawi.
Mayweather hi kum 2015-a boxing a chawlhsan hnuah a la inhnek leh miah lo a, McGregor pawh hi nikum November thlaa Eddie Alvarez a hneh hnu kha Octagon-ah a la inbei leh lo a ni. Sum ngaina tak Mayweather hian McGregor nena an inbei a nih chuan a tlem berah $100 million hlawh a duh thu a lo sawi lawk tawh a, Mcgregor hi $25 million hlawh tira pay-per-view atanga sum lut insem leh tur angin biak tum mahse Irish fighter hian a duh bik lo.
UFC President Dana White chuan fighter pahnih hi $25 million ve ve hlawha an inbeih phalsak mahse Mayweather tan $25 million hi engtham mah a ni lo ti ila kan sawisual lo ang. California state-in McGregor hi boxing license pe tawh mahse UFC nena inremna an siam thei a nih chuan Mayweather vs McGregor hi kan hmuh mai theih a rinawm loh a, sumdawnna khawvela a nih angin UFC President White pawh hian hlawkna a tel ve dawn a nih loh chuan McGregor hi Mayweather beih phalna a pe phal bik kherin a rinawm lo hle.