​McDowell's No 1 Soda Mizoram Premier League Champions Aizawl FC

16th December 2015, 03:12AM

McDowell's No 1 Soda Mizoram Premier League khelh zawh a ni ta a, Aizawl FC chuan final-ah si thum faiin Chanmari FC an hneh, MPL 4 Champion an ni ta a ni.

I-League club Aizawl FC hi champion lai an ni a, an title an humhim a, Mizoram Premier League season 4 neih tawhah champion vawi hnih ni thei awmchhun an ni a, a zawnin an champion nghe nghe bawk a ni.

Aizawl FC 3-0 Chanmari FC

Alfred Kemah Jaryan 27', 33', Brandon VL Remdika 47'

Aizawl FC XI: Yuta Kinowaki, Lalramchullova, Immanuel HS Lalthazuala, Lalruatthara, Ronald Zothanzama, Brandon Vanlalremdika, Albert Zohmingmawia, R Malsawmtluanga, H Lalbiakthanga, Alfred Kemah Jaryan, Soram Poirei Anganba

Chanmari FC XI: F Lalmuanawma, Joseph Lalnunpuia, Lalhriatrenga, R Laldanmawia, Vanlalthlamuana, Lalrinchhana Tochhawng, Lalrozama Fanai, Reuben Zosangpuia, Rochhingpuia, Malsawmfela, Lalnunmawia,

First half-ah goal hnih a lut a, heng goal hnihte hi Alfred Kemah Jaryan khung ve ve a ni. First half-a goal hnihte hi Chanmari FC tlar hnung lam thiam loh a ni a. Goal hmasa ber hi 27th mins-a lut a ni a, halfway line atangin Albert Zohmingmawia chuan ball chak takin dinglam sirah a tlan luh pui.

Albert-a chuan a cross a, tuma chan loh Alfred-a chuan box chhung atangin awlsam takin a pet goal ta a ni. Chanmari FC defender-te khan Alfred-a kha an ngaihtuah lo hrim hrim a, mual dinglama Alfred-a ball khalh chiah an en avangin awlsam takin an lamah a goal phah ta a ni.

oal hnihna hi 33rd mins-a lut a ni a, ball hlauhawm pawh ni lo chu Rinchhana chuan an lamah a tauh let, Alfred-a chuan chak takin a umlut nghal a, box chhung a tlan luh pui vel tihin Chanmari FC goalkeeper Lalmuanawma ding lamah a pet, a goal chiang hle. Alfred hian tun season MPL-ah goal 9 a khung ta a ni.

Goal thumna hi second half tan tira lut a ni a, 47th mins-ah Chanmari FC goalkeeper ben per chu Alfred chuan a tauh a, goal bar a per, hemi per hi Brandon VL Remdika chuan far post atangin a tauh, a goal chiang kher mai. Hemi hnu chiah hian Aizawl FC chuan goal khungna chance an nei chhunzawm leh a, box pawn atanga MS-a shot tha zet chu Chanmari FC goalkeeper Muanawma'n a save a ni.

Chanmari FC hian inkhel bul an tan tha a, chance hlauhawm pawh tan atanga minute 6-na lekah an nei nghal. Mual veilam sir atanga Thlamuana cross tha zet chu box chhunga lo awm Malsawmfela chuan a pet goal dawn emaw tih laiin Chullova chuan a lo tibuai a, a goal lo chiah chiah, kha kha chu goal selang chuan inkhel chanchin a danglam ngei ang le. Tin, Chanmari FC hian first half tawp dawn lamah goal khungna chance tha tak an nei leh a, Malsawmfela ball pek tha zet chu Temama chuan box dinglam atangin a shot a, Aizawl FC goalkeeper Soram Poirei Anganba chuan a kut dinglamin a lo dang hman hlauh a ni.

e match-ah hian Aizawl FC Japanese midfielder Yuta a khel tha fal nalh a, Chanmari FC-in midfield-a game thunun tum hle mahse Yuta experiance leh skills an khan lo a ni deuh ber mai. Hetih lai hian first half-a hnawhchhuah a tawk lo erawh a vannei hle. Achia chuan Yuta a titlu a, hemi hnuah hian Yuta chuan Achia hi a nghawk, Achia a thal tawp a, zawn chhuah a ngai, referee chuan Achia leh Yuta-te hi yellow card ve ve a pe ta a ni.

I-League Club Aizawl FC hian champion an phu a, McDowell's No 1 Soda Mizoram Premier League-a point hmu sang ber an ni a, squad pawh an nei chhah hle nghe nghe. Inkhelh hma atang tawhin champion rinkai an ni a, mipui rin ang ngeiin Aizawl FC chu 2015 McDowell's No 1 Soda Mizoram Premier League Champion an ni ta a ni. Champion Team Aizawl FC hian Cheng Nuai 5 leh Trophy an dawng ta a ni.

MPL 4-a mimal lawmman hetiang sem a ni. (Trophy mawi tak leh Rs. 5,000 theuh an dawng)

Best Player : F. Lalrinpuia (Aizawl FC)

Best Goalkeeper : Lalawmpuia (Zo United FC)

Best Defender : Lalrinchhana Tochhawng (Chanmari FC)

Best Midfielder : K. Lalthathanga (Bethlehem Vengthlang FC)

Best Forward : F. Lalrinpuia (Aizawl FC)

Top Scorer : F. Lalrinpuia (Aizawl FC) Match 11 atangin goal 13 a khung a ni.

Prize Money hetiang hian

8. Mizoram Police FC - Rs. 50,000

7. Luangmual FC - Rs. 75,000

6. Chanmari West FC - Rs. 1,00,000

5. Dinthar FC - Rs. 1,25,000

4. Zo United FC - Rs. 1,50,000

3. Bethlehem Vengthlang FC - Rs. 2,00,000

2. Chanmari FC - Rs. 3,00,000

1. Aizawl FC - Rs. 5,00,000

Fair Play : Aizawl FC (Rs. 20,000)

pictures credit : PC Lala

Copyright © inkhel.com 2024. All rights reserved.