MBL Ropui takin a zo ta : Hlimen Shuttlers-in hlimna nen nomawi an chawi

25th November 2015, 06:11PM

November ni 24, 2015 zana Mizoram Badminton League final khelhah Hlimen Shuttlers ten Saron Jeremys Smashers 3 -2 a hnehin Champion an ni ta. Third Place zawnna Kulikawn Panthers leh Tuikual S Phengphehlep an khelhah Kulikawn in chakna changin pathumna an ni bawk. MBL chhung zawnga khel tha ber, Player of the League-ah Daniel S Farid, Kulikawn Panthers chu thlan a ni bawk.

Final khelah hian Sr. Mens Double-a bul tan niin Saron lamin an player pangngai Nunsiama leh Thanzuala an rawn khelh tir a, chutiang bawkin Hlimen lam pawhin Muanawma leh Remruata te an rawn dah leh a, game a hmuhnawm a, Saron lam game erawh in rin leh beisei a phak lo hle thung, minute 19:51 chhungin Hlimen lam hian 15-6 leh 15-14 in match hmahruaitu nihna an rawn chang.

Mixed Doubles khelh chhunzawm a ni a, Saron lam atangin inkawp remsa Dinmawia leh Hriati an rawn chhuaka, Hlimen atang erawhin hmel that kan hmu thung a, Duhzuali chhawmdawl turin Zarkima a rawn lang thung, Hlimen lam partner-te an tangdun tamloh a lang. Minute 16:17 khelh a nih meuh chuan Saron lamin 15-7 leh 15-5 in an rawn chak ve leh thung. Mens Singles khelh chhunzawm a ni a, state pawn player ve ve rawn chhawp chhuakin Hirak leh Manajit te an in hmachhawn a, game a hmuhnawm a, senior player zawk nihna lantirin 15-12 leh 15-9 in Hirak chakin Hlimen lam fans au a ring lehzual. Hlimen lam hian 2-1 in hma an rawn hruai.

Jr. Boys Singles khelh chhunzawm a ni a, Hlimen lamin Sawmsanga an rawn chhuah a, Saron lamin Esh-a an rawn chhuah bawk, an game a hmuhnawm a, tharum lamah Sawmsanga a tha zawk, mahse Esh-a erawh in thluak a hmang thung, an game a hmuhnawm a, MBL chhunga game reiber niin minute 33:20 khelin, badminton atan thluak a pawimawh tih lantirin Esh-a’n 12-15, 15-11 leh 11-7 in chakna a rawn chang ta a ni. 2-2 a in draw in deciding a ngai, Mens Doubles an rawn lut ve leh, Hlimen lam fachuam Hirak hmel kan hmu, Semi-final ah Hirak hi Mens Double ah Awmpuia nen an dah tawh a, mahse, khelh ngai lovin an chak a nih kha, Final ah erawh game a sang a, Hirak tanpui turin Muanawma a rawn lang thung, hemi te hi an vawikhat khelhdunna a nih bakah Doubles-ah Hirak hmel kan vawikhat hmuhna a ni bawk.

Saron lam pawhin rawn in siksawiin Manajit leh Nunsiama an rawn dah ve bawk, an ni pawh hi an vawikhat khelh dunna a ni a, game tan a ni, chakzawk tur hriat thiam a har khawp. Chutin laiin Saron lamin game hmasa an rawn la, fans te au thawmin tawp lai a nei thei ta lo, game hnihna khelh leh a ni a, Hlimen lamin tan rawn khawh ve lehin game an rawn la ve leh. Tun match hi champion nana deciding factor a nih bakah deciding game khelh a ngai ta, boruak a sangin entu lam thawm a nasa, tandun ngai lo ve ve tangdun an ni a, an tum ang leh beisei ang chuan an khel lo tih a hriat theih, minute 30:34 a ral meuh chuan BAI Ranking leh MBA Ranking-a sang zawk ve ve Hlimen players ten chakna an chang a, an champion pui ta a ni. Hlimen lam hi an vannei a tih loh theih loh ang, chutih rualin Saron lam pawh thiam lo an ni bik lo.

MBL match hi kan lo chhut chiang emaw ? Semi final ah khan Hlimen Shuttlers in League stage-a an hneh loh Kulikawn Panthers an hneh a, Saron lamin League stage a an hneh loh Tuikual S an hneh bawk. Third Place zawnna ah hian Kulikawn lam hian league stage-a an hneh tawh loh Tuikual S chu an hneh ve leh thung a, chutiang bawkin Final ah Hlimen Shuttlers ten league stage-a an hneh tawh loh Saron Jeremys Smasher chu hnehin an Champion ta a ni. League stage-a chakna chang lo zelin knock out stage ah chakna an chang zel a ni.

MBL Final hi a hmunah entu an tam hle a, Hall-a leng lo khawpin entu an tam a, a tir lama officials chiah awmna tura ruahmanah pawh final zan hian fans an thu khat vek a ni. MBL avang hian Badminton hian Mizoramah bungthar a kai bakah mi hriat leh ngaihsan a hlawh zual a ni.

pictures credit : David Sonata

Copyright © inkhel.com 2024. All rights reserved.