Hrangbana Memorial 1st Mizoram Badminton League (MBL) khel tur Team 5 te chuan Thawhleh zan khan Hotel Regency ah an player tur an lei fel ta a, tuna an lei bakah hian state pawn lam player an la lei leh thei dawn a ni.
Pi HS Dinpuii kaihhruai, MBL Players Auction ah hian Veng behchhan Team 5 ten player 38 an lei a, chung zinga manto ber chu Men's 35+ player Lalbiakmawia niin, Rs. 19,000 in Kulikawn Panthers in an lei a ni.
MBL danah veng tinin an veng chhung player pahnih an hum thei ang tih a nih angin Men's Singles Ranking a Number One Samuel Lalnunmawia chu Tuikual South Phengphehlep in an hum a, a base price Rs. 18,000 in an lei. Men's Number Two Lalmuanawma pawh an Veng Team Hlimen Shuttlers in an hum a, a base price Rs. 18,000 thovin an lei a ni.
Under 19 Boys Singles player Malsawmsanga chu kum naupang lam zinga manto ber ani a, Saron Veng Jeremy's Smashers in Rs. 13,000 in an lei a, hetihlai hian kum 45 chunglam player Zabiakthara chu Mission Veng in Rs, 15,100 a leiin senior lam zinga manto ber a ni.
Kulikawn Panthers, Hlimen Shuttlers, Tuikual South Phengphehlep leh Saron Veng Jerremys Smasher te hian player 7 chauh an lei a, Mission Veng chuan player 10 lei tawhin player pakhat chauh an lei thei tawh a ni. Team tin hian player 11 aia tam an nei thiang lo a ni. Player leinan hian League Governing Body chuan Rs. 55,000 bak hman a phal lova, team tin hian an budget an hmang zo lo deuh vek a ni. Hetihlai hian phai lam player (state pawn player) leinan erawh Rs. 55,000 pawn lam a\anga hman phalsak an ni thung.
MBL Players Auction ah hian league hming putu Pu Hrangbana (L) fapa, Pu Zohmingthanga (Atea) chuan Badminton player te hmasawnna tura an chhungkua in tha an lo thawh ve thei chu lawmawm a tihzia te, infiammiten tihtak zet leh rilru thianghlim tak pu chunga MBL hi khel se an duh thute a sawi a ni.
Hrangbana Memorial 1st Mizoram Badminton League hi November ni 5 ah khelh \an a ni dawn a, December thla tir thleng a awh ang a, Zonet TV chuan live in a pe chhuak thin dawn a ni. Hetia Team din fel a, player te an neih fel takah chuan Team tinin rang taka inkhelh practice nghal an tum thu an sawi a, state pawn player an lak turte pawh an rawn thleng thuai dawn nia hriat a ni