Manchester United leh Brentford te chu Bryan Mbeumo manah an inrem ta.     Ni 40 chuang an indawr hnuah club pahnih te hian inremna an nei ta a ni.

July ni 17 khan United chuan Mbeumo manah hian £65m bakah add-ons £5m an thehchhuak a, July ni 18 (Vawiin) khan Brentford leh United te chu Mbeumo manah hian £71million ($95.5m)-in an inrem ta a ni.

United hian £65m chu vawi 4 rulhah an hmang dawn a, bonus hi £6m a ni bawk dawn a ni. Club pahnih ten inremna an neih takah chuan, Cameroon international hian Old Trafford a pan dawn ta a, medical nei turin inbuatsaihna kalpui a ni chho dawn a ni.

United hian vawi hnih thum lai Mbeumo chungchangah hian Brentford an dawr a, Brentford lam hian Matheus Cunha man £62.5m aia to an chhiar tlat a, indawrna a tlawlh leh thin. Tunah erawh inremna an nei thei ta a ni.

Kum 25 mi Mbeumo hi tun nipui bazara United player lak pathumna a ni dawn a, United hian Cunha an lak tawh bakah player naupang Diego Leon an la tawh bawk a, Leon hian Paraguay club Cerro Porteno atangin Old Trafford a pan a ni.

Season liamta khan Mbeumo hian Premier League game 38 lai a khel a, goal 20 khungin, assist vawi 8 a nei a, Brentford chu 10-na a nihpui.

Mbeumo hi French club Troyes academy chhuak a ni a, kum 2019 khan Brentford a zawm. Kum 2021 khan Brentford chu Premier League-ah a kaipui a, English club tan hian game 242 a khel hman a, goal 70 khungin, assist vawi 51 a nei hman a ni.

Ruben Amorim chuan Premier League-a tlangnel sa forward hi a duhthusam a ni a, hei vang hian Mbeumo pawh chhiar to viau mah se, a la ta tho tho a ni.

Tun nipui bazarah hian United hi an che rang vak lo. Player la lut turin an player thenkhat an hralh a ngai. An player chhuak tura an duhte chuan club thar an hmu lawk thei lo a, an hlawh a tam tham avangin Old Trafford chhuahsan an hreh niin a lang bawk.