Manchester United chuan Bryan Mbeumo lak chhuah tumin tan an han khawh leh a, Cameroon international manah hian £65million bakah add-ons £5m an thehchhuak ta niin The Athletic chuan a tarlang.

United hian £45m bakah add-ons £10m an thehchhuah kha Brentford lamin an lo hnawl tawh a, hemi hnu hian £55m leh bonuses £7.5m an thehchhuak leh a, hei pawh hi Brentford chuan an lo hnawl leh a nih kha.

Mbeumo chungchangah hian Manchester United leh Brentford te chu ni 40 chuang an indawr tawh a, Brentford lam hian Matheus Cunha man £62.5m aia sang Mbeumo manah hian an phut a ni.

Thla hmasa ni 2 khan Mbeumo hian manchester United zawm a duh thu a lo sawi tawh a, kum 25 mi hian Brentford-ah a contract tawp a hmang mek a, kum 1 danga pawh sei theihna nei mah se, hei hi Mbeumo hian chhunzawm a duh lo a ni.

Manchester United hian Mbeumo chuhpuitu an nei ve reng bawk a, Tottenham chuan Cameroon international lak tumin hma an la ve mek. Brentford manager hlui Thomas Frank chu Spurs manager thar a ni tawh a, ani hian Mbeumo hi chhawm a duh ve bawk a ni.