23 Jan 2016 06:02

Inkhel

Mizo Sports Website hmasa ber

​MBBA League khelh mek a ni

MBBA League chu january 22, 2016(Zirtawpni) khan khelh chhunzawm a ni a, inkhel pali awm in Aizawl Venglai, Ramhlun Venglai Pirates, K.I.L leh Hollow BBSP-ten hnehna an chang.

Inkhel hmasa berah Aizawl Venglai-in 58-56 in VMS Kulikawn an hneh a, Jersey No.11 Johana chuan point 26 thunin Aizawl Venglai a chakpui.

Quarter hmasa berah chungnung zawk an awm hlei thei lova, Aizawl Venglai-in 13-12 in hma an hruai hram a. Quarter hnihnaah 14-13 in VMS an chungnung ve leh thung a, half time-a an dinhmun chu V.M.S 26-26 Aizawl Venglai chiah a ni. Quarter thumnaah Aizawl Venglai an kang tra hret a, point 19 an thun theih laiin VMS lamin point 15 an thun. 4th quarter-ah VMS-in pawhthlak tumin tan an khawh a, point 15 thunin Venglaiin point 13 an thun a, quarter hnuhnung berah thun tam zawk mahse quarter thumnaah an hniamna chu Aizawl Venglai chakna a ni ta a ni.

Division 11 inkhelah Titans chuan 58 - 54 in Ramhlun Venglai Pirates an hneh a, Taitans tan Mafela, jersey No.11 chuan point 21 a thun a, mimala chetha ber a ni.

Titans hian quarter tir atangin hma an hruai nghal a, quarter hnihnaah Pirates lamin point 1-in an thun tam hret thung. Half time-a an dinhmun chu Titans 29-27 Pirates a ni.

3rd quarter-ah pawh Pirates an chetha zel a, point 12 an thun theih laiin Titans lamin point 8 chauh an thun a, point 39 khawlin Titans an lehpel ta der mai a ni. 4th quarter-ah an innawr na hle mai a, Pirates an tang-ulh deuh nge point an thun mawh deuh a, point 15 an thun belh theih laiin Titans chuan point 21 zet mai an thun si a, point 4-in hnehna an chang ta a ni.

K.I.L leh Tuithiang inhmachhawnah basket a lam lova, mimala chetha pawh an awm em em lo. 55-42 in K.I.L-in hnehna an chang a, bul tan chhe zawk hle mahse 2nd quarter atanga a tawp thlengin an chungnung tluan a, hnehna an chang ta a ni.

Inkhel hnuhnung ber Division I ah Hollow BBSP chuan 72-38 in Morning Crew an sawp a, Hollow tan hian shooting guard Vanlalthanzuala chuan point 17 thunin mimala chetha ber a ni.

Hollow hian quarter hmasa ber atangin inkhel an thunun a, 20-4 zet maiin 1st quarter-ah hma an hruai hman. Half time-a an dinhmun chu Hollow 32-17 Morning Crew a ni. 3rd quarter-ah Hollow-in point 22 an thun belh a, quarter hnuhnung berah an chak dawn ngeia a lan tak avangin tha an thlah deuhin a hriat a, heti chung hian an la chungnung hle zel a, hun a tawp a, point 34 zet maiin hnehna an chang ta a ni.

Inrinni (23.01.16) Fixture:

09:30 AM Mohicans vs BethlehemDiv II

11:00 AM Kanan vs Bethlehem VTDiv II

12:30 PM K.K vs Fantasy Div II

02:00 PM Aces vs D.V.S.C 1Div I