Mizoram Basketball Association (MBBA) buatsaih Inter Basketball Tournament final khelh zawh a ni a, Aizawl District BC Bethlehem chuan Kolasib District champion, KTO chu  87 - 79 a hnehin Champion hmasa ber an ni.

Final-ah hian team pahnih te hi an inbei tawk hle a, fans an tang a, players an fuih thiam em em bawk.  Kolasib atangin fans engemawzat an rawn thawk chhuak bawk. Aizawl district fans lah an duai chuang lo. Aizawl leh Kolasib district fans te hi an in au chhawk zak zak a ni.

Kolasib District hi tournament-ah player nei tha ber an ni a, Champion tura rin kai zawk an ni. MSL Player (State Player) ni tawh mi 5 lai an kawl mahse, hnehna an chang zo lo. 

Aizawl district hian MSL player lo ni tawh pakhat an kawl a, hmanni lawka Division I Playoff lo champion puitu coach, Samuel Lalthlamuana hnuaiah hnehna an chang leh ta a ni. 

Aizawl district team hian final-ah hian hma an hruai char char a, Kolasib hi players experience nei tha ni mahse,  Aizawl district an lehpel thei lo. Aizawl district tan Captain David Lalthlamuana, power forward Samuel Malsawmkima leh point guard Lalhmangaiha te an khel tha tluan chhuak zak a, Captain David Laltlamuana chu Most Valuable Player ah thlan a ni.

Tournament buatsaihtu MBBA-in fak an phu a, inbuatsaihna hun chep tak karah engkim felfai taka zawh fel a ni.