Paris Saint-Germain president chuan an club atangin Kylian Mbappe leh Neymar te chu engtikah mah an chhuah a rin loh thu a sawi.

Kylian Mbappe leh Neymar te chu Nilai zana UEFA Champions League an khelhin player pawimawh ber pawl an ni a, he inkhelah hian Paris Saint-Germain chuan Atalanta chu 2-1 in an hneh a ni.

Mbappe chu la damkawr deuh mah se a tawp lam minute 30 chhung chu an khelhtir a, a khel pawh a pangngai nghal hle a, Eric Maxim Coupo-Moting goal thun theihna kawngah a inhnamhnawih a. Neymar chuan a hun tha neih a bawhpelh nual mai a, chuti chung chuan goal thun theihna kawngah a inhnamhnawih thei tho a ni.

PSG president Nasser Al-Khelaifi chuan, “Mi zawng zawngin Paris Saint-Germain chu UEFA Champions League atan kan la inpeih lo niin an sawi thin a. Hetiang karah hian kan player te chuan kal zel thei kan ni tih an lantir a ni,” a ti.

“Kan thil tum hi a sang hle a, tunah rih chuan final kan la thlir dawn rih lo a, semi final chin chiah hi kan rilruah kan dah rih ang. Kan rilru put dan kan siam fel hi a pawimawh em em a, nasa takin min kaihruai chiang a ni,” a ti bawk.

A sawi zelnaah, “Neymar leh Kylian te hi khawvela player ropui ber pawl an ni a, chutih rualin team pumpui kha an che tha a, game tha tak mai an khel thei a, an thawhhona tha tak zar kan zo a ni ber a. Neymar kha a mi mal tak chuan a che tha hle,” a ti.

“Anni pahnih hian team boruak hi an thlak danglam thei viau zel a, an pahnih hian kan hnenah an la awm zel dawn a, engtikah mah an chhuah hi ka ring lo,” tiin Al-Khelaifi chuan a sawi a ni.

UEFA Champions League semi final-ah hian Paris Saint-Germain chuan Atletico Madrid leh RB Leipzig te inkhela chak zawk zawk an hmachhawn dawn a ni.