Kylian Mbappe hi tun dinhmunah chuan khawvela rawlthar tha ber a nih loh pawhin ani aia tha zawk an tam lem lo khawp ang. Kum 18 mi Monaco rawlthar duhawm hi Europe-a club lian zawng zawngin lakluh duh mahse Monaco CEO Vadim Vasilyev chuan Mbappe hralh tumna an nei lo tih a sawi.

Ligue-1 a Monaco champion pui hlim Mbappe hian tun season-ah goal 26 khungi thiante pet goal tura siamsak tum 15 lai a nei bawk a, goal 26 a khung zinga 6 hi Champions League-a a khung a ni nghe nghe.

Vasilyev chuan, "Player thenkhat hralh hi chu kan kalphung ve reng a ni a, nimahsela kum hnih kalta ai kha chuan ka sum dinhmun a tha zawk a ni. Kan player naupangte hlutna hi a tlahniam dawn lo a, player tha tak tak vek an ni. Mbappe kawl chhunzawm zel hi ka thiltum lian ber a ni," tiin Real Madrid nena sawizawm nasat tak Mbappe chu hralh an tum lo tih a sawi.