Italian goalkeeper ropui Gianluigi Buffon chuan Paris Saint Germain tana a khelhpui French rawlthar duhawm tak Kylian Mbappe chuan Ballon d’Or dawn a phu a thu a sawi.

Ballon d’Or dawng thei tur hming 30 tarlanah Mbappe-a hming hi a awm a, PSG tan a che tha hle a, trophy pathum ngawt season hmasa khan Paris club hi a chawipui. Kumin World Cup-ah kum 19 mi chauh ni mahse France player pawimawh tak a ni a, France hian World Cup nomawi an chawi nghe nghe a, Mbappe hian Best Young Player lawmman a la bawk. World Cup-ah hian goal li a Mbappe hian a khunga, final-ah Croatia lakah pawh a thun bawk a ni.

World Cup zawh hnu pawhin Mbappe hian hma a sawn zela , tunah hian PSG tan tun season-ah vawi sarih inlan tawhin goal 10 ngawt a khung der tawh. Mi tam takin nakin hunah Mbappe hian Ballon d’Or a dawn ngei an ring a, mahse PSG goalkeeper Buffon erawhin Mbappe hian kuminah ngei Ballon d’Or dawn hi a phu tih a sawi.

Kum 40 mi Buffon chuan, “Mbappe hi khelmual chhunga a thatzia kan hmu a, World Cup-ah France tan a pawimawh zia pawh kan hmu. Ballon d’Or dawn hi a phu a, phu lo tih theih a nilo. Italy-ah chuan Roberto Baggio, Alessandro Del Piero leh Francesco Totti-te nen kan tehkhin deuh ber a, Mbappe anga player tha hi an tam lo.”

“A inkhel hi a hmuhnawm em em a, tha ber nih duhna thinlung hi a put renga, tun anga a phur reng bawka, a nungchangin a zir phawt chuan hun rei tak a daih ang,” a ti.

Kuminah Real Madrid midfielder leh Croatia captain Luka Modric a che ropui hle a, mimal lawmman lian tham chu a hui vek a ni ber. Ballon d’Or hi sem a la ni lova, Modric hian a dawn leh mai pawh a rinawm ber. Mahse Ballon d’Or hi France Football-in a sem thin a ni a, kuminah France-in World Cup nomawi an lo chawi bawk nen, French player pathum; Antoine Griezmann, Kylian Mbappe leh Raphael Varane-te zinga a tu emaw ber hian Ballon d’Or hi an dawn mai a rinawm ve bawk a, sawi tawh angin World Cup nomawi an chawi a, club lamah an che tha hlawm bawk nen heng French player-te hian Ballon d’Or hi an phu lohna a awm bik lo a ni.