French heavyweight Paris Saint-Germain president Nasser Al-Khelaifi chuan an player Kylian Mbappe chu PSG atangin a chhuak dawn lo tih chiang takin a sawi.

Kum 20 mi Mbappe hi PSG-ah a duhkhawp hmu lo ang leh club thar zawm mai tur anga sawi a ni nasa viau a, Real Madrid nen sawizawm a ni nasa hle. Mahse Al Khelaifi chuan an player hi chhuah tir a tum lo.

AL-Khelaifi chuan, “Mbappe hi chhuah tir ka tum reng reng lova, kan player-te hi kan jersey an hak hian a hlut zia an hre tur a ni a, an duh dan leh nuam an tih chin chauha awm tur an ni lo. Mbappe hi kan hma thlir hi min tuipui em em a, team ruala hmalam pan zel a duh.

“Kan thil tum chiang takin ka hrilha, chumi ti thei tur chuan ka hmaa awm apiang kan sut tlang a ngaih thu pawh ka hrilh. Mbappe hi player fing tak a ni a, a hrethiam ngei pawhin ka hria. PSG-ah hian a awm leh dawn tih hi 100% mai ni lovin, 200% in ka chiang a ni,” a ti.

Khawvela player manto ber dawttu Mbappe hian tun season hman zawh tak chiahah khan PSG tan vawi 43 a inlana, goal 39 lai a khung a ni.