Paris Saint-Germain football advisor Luis Campos chuan, an forward Kylian Mbappe-a'n a hnenah emaw, PSG president Nasser Al-Khelaifi hnenah emaw chhuah a dil lo tih a sawi.
Thawhtanni khan chanchinbu mi te chuan Mbappe hian PSG hotu te nen an inhmuh thiam loh avangin, nakkum January thla-a chhuah a dil angin an tarlang nasa hle a, chanchinbu mi rintlak tak tak te pawhin tarlang mah se, he thuthang hi thudik a ni em tih finfiahna a la awm lo.
PSG-in a hnena an thutiam te an hlen loh avangin, Mbappe hi PSG lakah a lungawi lo hle nia sawi a ni a, PSG hian January thlaah hian a phu tawka dawrtu an awm chuan kum 23 mi hi an hralh phal niin chanchinbu mi te chuan an tarlang bawk a ni.
Hetiang tak hian thu thehdarh ni mah se Mbappe hian chhuah a la dil lo niin a lang a, Campos hian French TV station Canal Plus-in an kawmnaah Mbappe-a’n chhuah a dil loh thu hi a sawi lang.
Mizo in pan lovah tho a fu ngai lo kan tih angin, Mbappe leh PSG te inkarah hi chuan eng emaw chu a awm ngei a rinawm a, club lam hian an thup rih pawh a ni thei a, thudik a nih chuan rawn irh chhuah tak tak hun a nei dawn tih a chiang.
Hetiang thuthang a awm hnu lawk hian, Thawhlehni zanlai khan PSG chuan UEFA Champions League group stage inkhelah Portuguese club Benfica an lo mikhual a, 1-1 a inhnehtawkin, he inkhelah hian Mbappe chuan inkhel bul a tan a, French forward hian goal a khung nghe nghe a ni.
Real Madrid-in nasa taka lei chhuah an tum hnuah, Mbappe hian kumin May thla mai khan PSG-ah hian kum 2025 June thla thleng daih contract a ziak ta zawk a, mahse PSG-ah hian kumin bak a khel tawh lo maithei a, thudik a rawn lang thuai tura ngaih a ni.
Tarlan danin, PSG hian Mbappe hi a chhuah an phal sak a, mahse Real Madrid hnenah erawh hralh an tum lova, Real Madrid nilo, club dangin a phu tawka an dawr chuan PSG hian an forward hi chhuah tir an hnial tawh bik lo niin a lang.
Mbappe hian season khat loan-a PSG a zawm hnuah, kum 2018 khan a nghetin Paris-ah hian AS Monaco atangin a inpu lut a, a manah PSG hian euro maktaduai 180 lai sengin Mbappe hi khawvela footballer man to ber dawt tu a nih bakah, teenager man to ber a ni a, PSG tan hian Champions League-ah goal 31 thun tawhin, PSG tana Champions League-a goal khung hnem ber a ni.